मुख्यमंत्र्यांच्या टीव्ही शोवर ४ कोटींचा खर्च

मटा ऑनलाइन वृत्त । मुंबई

राज्यातील जनतेशी संवाद साधण्यासाठी मुख्यमंत्री देवेंद्र फडणवीस यांनी 'मी मुख्यमंत्री बोलतोय', 'जय महाराष्ट्र' आणि 'दिलखुलास' हे कार्यक्रम दूरचित्रवाणीवर सुरू केले आहेत. या कार्यक्रमांच्या प्रत्येक भागावर (शो) २७ लाख ९ हजार ४०० रुपये खर्च करण्यात येत असून संपूर्ण वर्षात त्यावर ४ कोटी ४५ लाख १२ हजार आठशे रुपये खर्चाची तरतूद करण्यात आली आहे.

पंतप्रधान नरेंद्र मोदी यांनी देशातील जनतेशी संवाद साधण्यासाठी रेडिओवरून 'मन की बात' हा कार्यक्रम सुरू केला. त्याच धर्तीवर मुख्यमंत्री देवेंद्र फडणवीस यांनी 'सह्याद्री' दूरचित्रवाणीवर 'जय महाराष्ट्र', 'दिलखुलास' आणि 'मी मुख्यमंत्री बोलतोय' हे कार्यक्रम सुरू केले आहेत. महिन्यातून दोनदा हा कार्यक्रम दूर चित्रवाणीवर दाखविण्यात येतो. वर्षाला त्याचे एकूण २४ भाग प्रसारित करण्यात येणार आहे. या कार्यक्रमाचे चित्रीकरण, चित्रीकरणाचे क्रोमा करणे, कलर करेक्शन, मॉन्टेज म्युझिक, मेकअप, लाईटमन, प्लोअर मनसह कार्यक्रमाची निर्मिती आणि चित्रीकरणासाठी एकूण ४ कोटी ४५ लाख १२ हजार ८०० रूपये खर्च होणार आहेत. या खर्चाच्या मंजुरीसाठी राज्य सरकारने ५ ऑक्टोबर रोजी परिपत्रक काढले आहे.

दरम्यान, राज्य सरकारच्या प्रसिद्धी विभागानं या खर्चाचं समर्थन केलं आहे. मार्केट रेटपेक्षा या कार्यक्रमांचा खर्च खूपच कमी आहे. तुलनेने आम्ही कमी खर्चात हा कार्यक्रम करत असल्याचं प्रसिद्धी विभागाचं म्हणणं आहे. तर मार्केट रेट पेक्षा या कार्यक्रमांवरचा खर्च अधिक आहे. या खर्चाला मंजुरी देण्यापूर्वी त्याची शहानिशा करायला हवी, अशी मागणी राष्ट्रवादीचे प्रवक्ते नवाब मलिक यांनी केली.