अधिकाऱ्याविरोधात विनयभंगाची तक्रार

मुंबई : वांद्रे येथील एमएमआरडीए मुख्यालयातील एका वरिष्ठ अधिकाऱ्याविरोधात महिला कर्मचाऱ्याने विनयभंगाची तक्रार नोंदवली आहे. मिलिंद पाटील असे या अधिकाऱ्याचे नाव असून, अनेक दिवसांपासून तो लैगिक छळ करत असल्याचा आरोप ३७ वर्षीय तक्रारदार महिलेने केला आहे.

तक्रारदार महिला एमएमआरडीए मुख्यालयात काम करते. त्याच ठिकाणी पाटील वरिष्ठ अधिकारी आहे. नोव्हेंबर २०१६पासून पाटील विविध मार्गाने महिलेशी जवळीक साधण्याचा प्रयत्न करत असल्याचे तिने तक्रारीत म्हटले आहे. या प्रकाराकडे सुरुवातील पीडित महिलेने दुर्लक्ष केले. मात्र रोजच्या त्रासाला कंटाळून अखेर तिने गुरुवारी दुपारी पाटीलविरोधात बीकेसी पोलिस ठाण्यात तक्रार नोंदवली. या प्रकरणाचा तपास महिला सहाय्यक पोलिस निरीक्षक अधिकारी करत असून, त्यांनी याबाबत अधिक माहिती देण्यास नकार दिला. दरम्यान, याप्रकरणी पोलिसांसमोर बाजू मांडू, असे पाटीलने सांगितले.