शाळांच्या आजच्या सुट्टीवरून संभ्रम

म. टा. प्रतिनिधी, मुंबई

मुंबईसह उपनगरात आज, सोमवारी होऊ घातलेल्या शिक्षक आणि पदवीधर मतदारसंघाच्या निवडणुकीसाठी शिक्षण उपसंचालकांनी सुट्टी जाहीर केली खरी. पण, या सुटीमुळे अनेक शाळा आणि पालकांमध्ये रविवारी संभ्रमाचे वातावरण होते. शिक्षण उपसंचालकांनी शनिवारी उशिराने सुट्टीसंदर्भातील परिपत्रक जाहीर केल्याने पालकांपर्यंत सुटीची माहिती मिळालेली नाही. ज्या शाळेत नोंदणीकृत मतदार नाहीत, त्यांनी मात्र शाळा सुरू ठेवण्याचा निर्णय घेतल्याने सोमवारच्या सुट्टीबाबत संभ्रम निर्माण झाला आहे.

निवडणुकीच्या निमित्ताने मुंबई शहर आणि उपनगर जिल्ह्यातील सर्व शाळा, उच्च माध्यमिक शाळांसह, कनिष्ठ महाविद्यालयांना विशेष सुट्टी जाहीर करण्यात आली आहे. विभागीय शिक्षण उपसंचालक कार्यालयाकडून यासंदर्भातील आदेश देण्यात आले आहेत. शिक्षक मतदारांना मतदानाचा हक्क बजावता यावा यासाठी ही सुट्टी आहे. या निर्णयानुसार इतर बोर्डाच्या शाळांनाही हा निर्णय लागू असणार आहे.