काँग्रेस नेते एकनाथ गायकवाड यांचं करोनामुळं निधन

मुंबईः काँग्रेसचे नेते व माजी खासदार एकनाथ गायकवाड यांचे करोनामुळं निधन झालं आहे. मुंबईतील ब्रीच कँडी रुग्णालयात त्यांच्यावर उपचार सुरु होते. एकनाथ गायकवाड यांना काही दिवसांपूर्वी करोनाची लागण झाल्यामुळं उपचारांसाठी रुग्णालयात दाखल करण्यात आलं होतं. मात्र, आज उपचारादरम्यान त्यांचं निधन झालं आहे.

गायकवाड यांना करोना संसर्गाची लागण झाल्यानंतर रुग्णालयात दाखल करण्यात आलं होतं. २० दिवस त्यांच्यावर उपचार सुरु होते. मात्र, आज सकाळी १० वाजता त्यांनी रुग्णालयात उपचारादरम्यान अखेरचा श्वास घेतला. ते ८१ वर्षांचे होते. राज्याच्या शालेय शिक्षणमंत्री वर्षा गायकवाड यांचे ते वडिल होते.

काँग्रेस पक्षाचे निष्ठावंत म्हणून एकनाथ गायकवाड यांची ओळख होती. त्यांनी मुंबई काँग्रेसचं अध्यक्षपदही भूषवलं होतं. एकनाथ गायकवाड यांनी शिवसेना नेते व लोकसभेचे माजी सभापती मनोहर जोशी यांचा पराभव केला होता. ते दोनवेळा खासदार म्हणून निवडून आले होते. एकनाथ गायकवाड यांच्या निधनामुळं काँग्रेसपक्षाला मोठा धक्का बसला आहे.


उपमुख्यमंत्री अजित पवार यांनी वाहिली श्रद्धांजली

एकनाथ गायकवाड यांच्या निधनामुळे राज्यातील महाविकास आघाडी सरकारने ज्येष्ठ मार्गदर्शक गमावला आहे. डॉ. बाबासाहेब आंबेडकरांच्या विचारांवर प्रगाढ निष्ठा आणि काँग्रेसच्या विचारधारेशी ते जीवनभर प्रामाणिक राहिले. त्यांचं निधन ही समाजातील पुरोगामी, सुधारणावादी चळवळीची मोठी हानी आहे, असं अजित पवार यांनी म्हटलं आहे.

एकनाथ गायकवाड यांना अशोक चव्हाण यांची श्रद्धांजली

ज्येष्ठ नेते एकनाथ गायकवाड यांच्या निधनामुळे काँग्रेस पक्षाचा एक प्रमुख चेहरा काळाच्या पडद्याआड गेल्याचे सार्वजनिक बांधकाम मंत्री अशोक चव्हाण यांनी म्हटले आहे. अनेक मोठ्या जबाबदाऱ्या गायकवाड यांनी सांभाळल्या. पण आपली साधी राहणी व कार्यकर्त्यांशी संपर्क त्यांनी कधी सोडला नाही. ते खऱ्या अर्थाने सर्वसामान्य जनतेचे व कार्यकर्त्यांच्या मदतीला धावून जाणारे नेते होते. त्यामुळेच प्रदीर्घ काळ आमदार व खासदार म्हणून प्रतिनिधीत्व करण्याची जबाबदारी जनतेने मोठ्या विश्वासाने त्यांच्यावर सोपवली होती, अशा शब्दांत चव्हाण यांनी श्रद्धांजली वाहिली आहे.