माझ्याही मनात आत्महत्येचा विचार होता; काँग्रेस नेत्याचा खुलासा

मुंबईः बॉलिवूड अभिनेता सुशांत सिंह राजपूत याच्या आकस्मित निधनानं बॉलिवूडसह क्रिडा आणि राजकिय क्षेत्रातील दिग्गजही हळहळले. अनेकांनी ट्विटरच्या माध्यमातून सुशांतला श्रद्धांजली वाहिली आहे. काँग्रेस नेते मिलिंद देवरा यांनीही सुशांतच्या निधनाने मोठा धक्का बसला आहे. ट्विटरच्या माध्यमातून त्यांनी त्यांच्या भावनांना वाट मोकळी करून दिली. तसंच, माझ्याही मनात आत्महत्येचा विचार आला होता असा धक्कादायक खुलासा त्यांनी केला आहे.


माझ्याही मनात आत्महत्येचा विचार आला होता. एकदा नव्हे तर दोनदा... पहिल्यांदा लहान असताना तर दुसऱ्यांदा खासदार असताना. मात्र नंतर मी दुःखासोबत जगायला शिकलो. असं ट्विट मिलिंद देवरा यांनी केलंय. तसंच, त्यानी नैराश्यावर कशी मात केली आहे याबाबतही पाच उपाय सुचवले आहेत.

वाचाः सुशांतच्या वडिलांना टीव्हीवर समजली निधनाची बातमी

मिलिंद देवरा यांनी सांगितलेले पाच उपाय

>> कुटुंबीय, मित्र, सहकारी यांना भेटा, त्यांच्याशी मनमोकळेपणानं बोला

>> नैराश्य हे वय, लिंग, आर्थिक स्तिथी, यश यावर अवलंबून नसतं. ते कोणालाही येऊ शकतं. म्हणूनच मानसिक आरोग्यासाठी मनसोपचारतज्ज्ञाकडं जा.

>> आपल्या आतील राक्षसासोबत लढत राहा. त्याला कधीच बाहेर येऊ देऊ नका.

>> आयुष्य सुंदर आहे. पुढे जाण्याच्या शर्यतीत अडकू नका. ज्या गोष्टींनी तुम्हाला आनंद मिळतो ते करा, संगीत, प्रवास, कुकिंग, वाचन, तुमचे छंद जोपासा.

>> सगळ्यात महत्त्वाच म्हणजे स्वतःवर प्रेम करा.

दरम्यान, सुशांत सिंह राजपूत गेल्या सहा महिन्यांपासून नैराश्यानं घेरलं होतं. त्यावर उपचारही सुरू होते. मुंबई पोलिसांकडून या घटनेचा अधिक तपास करण्यात येत आहे. छोट्या पडद्यावरील मालिकांमध्ये काम करत त्याने करिअरला सुरुवात केली होती. २०१३ मध्ये ‘काइ पो छे’ या चित्रपटातून त्याने बॉलिवूडमध्ये पदार्पण केलं. या चित्रपटासाठी त्याला फिल्मफेअरचा पुरस्कारदेखील मिळाला होता. शुद्ध देसी रोमान्स, एम.एस. धोनी, छिछोरे, केदारनाथ या सारख्या सिनेमात त्यानं काम केलं होतं.

वाचाः सुशांत नेहमी कुटुंबाचा विचार करायचा; सहकलाकारांनी सांगितल्या आठवणी