मुंबई: काँग्रेस-राष्ट्रवादी समन्वय समितीच्या बैठकीपूर्वीच काही तरी बिनसल्याने राष्ट्रवादीचे विधिमंडळ गटनेते अजित पवार प्रचंड वैतागले आहेत. राष्ट्रवादी काँग्रेसचे अध्यक्ष शरद पवार यांना भेटल्यानंतर ते तडकाफडकी बारामतीच्या दिशेने निघाले. समन्वय समितीची बैठकही रद्द झाल्याचं त्यांनी वैतागून सांगितल्याने राष्ट्रवादी काँग्रेस अंतर्गत काही तरी वाद निर्माण झाल्याचं सांगण्यात येतं असून अजितदादांच्या नाराजीचं कारणही अद्याप गुलदस्त्यात आहे.

राज्यात राष्ट्रपती राजवट लागू झाल्यानंतर पुढची रणनीती ठरविण्यासाठी आज सायंकाळी ७.३० वाजता काँग्रेस-राष्ट्रवादी समन्वय समितीची बैठक होती. त्यापूर्वी राष्ट्रवादीचे अध्यक्ष शरद पवार यांच्या निवासस्थानी राष्ट्रवादी काँग्रेसची बैठक होती. त्यासाठी राष्ट्रवादीचे प्रदेशाध्यक्ष जयंत पाटील आणि अजित पवार यांच्यासह राष्ट्रवादीचे महत्त्वाचे नेते उपस्थित होते. पक्षांतर्गत चर्चेनंतर राष्ट्रवादीचे नेते काँग्रेससोबत बैठक करण्यासाठी जाणार होते. मात्र त्यापूर्वीच १५ मिनिटे आधी अजित पवार सिल्व्हर ओक बंगल्यातून तडकाफडकी बाहेर पडले. त्यांच्यासोबत जयंत पाटील होते. अजितदादा प्रचंड वैतागलेले होते, त्यांचा चेहराही लालबूंद झालेला होता. आजची काँग्रेसबरोबरची बैठक रद्द झाली असून मी बारामतीकडे निघालोय, असं अजितदादा वैतागून म्हणाले. त्यानंतर त्यांनी कोणत्याही प्रश्नाचं उत्तर न देता 'नो कमेंट्स' असं म्हणत ते गाडीतून निघून गेले. राष्ट्रवादी काँग्रेसमध्ये काही तरी मोठा वाद झाल्यानेच अजित पवार बारामतीला रवाना झाल्याचं सांगण्यात येतं. पद आणि जबाबदाऱ्यांच्या वाटपावरून हा वाद झाल्याचं सांगण्यात येतं. मात्र राष्ट्रवादीच्या नेत्यांनी त्यावर काहीही भाष्य करण्यास नकार दिला. सर्व काही अलबेल असल्याच्या अविर्भावात राष्ट्रवादीचे नेते होते. राष्ट्रवादीचे नेते सुनील तटकरे आणि आमदार धनंजय मुंडे यांनीही बैठकीत कोणताही वाद झाला नसल्याचं स्पष्ट केलं. बैठकीला मी शेवटच्या क्षणी आलो. सोमवारी लोकसभेचं अधिवेशन आहे. चार आठवडे हे कामकाज चालणार आहे. त्यामुळे अधिवेशनात काय मुद्दे मांडायचे यावर चर्चा झाली. काँग्रेससोबत राष्ट्रवादीची बैठक आहे की नाही, याबाबत मला माहिती नाही, असं तटकरे म्हणाले.

दरम्यान, राष्ट्रवादीचे विधिमंडळ गटनेते अजित पवारच नसल्याने काँग्रेसबरोबरची बैठक रद्द करण्यात आली आहे. काँग्रेसचे ज्येष्ठ नेते अशोक चव्हाण यांनी आज समन्वय समितीची बैठक निश्चित नव्हती, असं स्पष्ट केलं. काँग्रेसची अंतर्गत बैठक सुरू आहे. त्यासाठी आम्ही जमलोय. राष्ट्रवादीसोबत बसायचं आज ठरत होतं. पण निश्चित असं नव्हतं. आम्ही त्यांच्या निरोपाची वाट पाहतोय, असं सांगत आमच्यात कोणताही वाद नसल्याचंही अशोक चव्हाण यांनी सांगितलं.

सेनेसोबत आघाडी रोखण्याचा भाजपचा प्रयत्न!

महाआघाडी: सत्तेचा नवा फॉर्म्युला झाला तयार?

बैठक रद्द नाही

दरम्यान, काँग्रेसचे नेते पृथ्वीराज चव्हाण यांनी काँग्रेसची आजची बैठक रद्द झाली नसल्याचं स्पष्ट केलं. मीडियानं चुकीचं वृत्त देऊ नये, काँग्रेसची बैठक सुरू आहे, असं ट्विट पृथ्वीराज चव्हाण यांनी केलं आहे.