काँग्रेस-राष्ट्रवादीत फूट, सरकार खुश

मटा ऑनलाइन वृत्त । मुंबई

राष्ट्रपतिपदाच्या निवडणुकीत विरोधकांची मतं फुटल्यानं सत्ताधारी भाजप खुशीत असतानाच, आज पावसाळी अधिवेशनाच्या पार्श्वभूमीवर काँग्रेस आणि राष्ट्रवादीतील मतभेद उघड झाले आहेत. विधानसभेचे विरोधी पक्षनेते राधाकृष्ण विखे पाटील यांच्या घरी आयोजित केलेल्या बैठकीकडे राष्ट्रवादी काँग्रेसने पाठ फिरवली आहे आणि स्वतंत्र पत्रकार परिषद घेण्याचीही घोषणा केली आहे. विरोधकांमधील ही फूट देवेंद्र सरकारच्या पथ्यावर पडू शकते.

राज्य विधिमंडळाचं पावसाळी अधिवेशन उद्यापासून सुरू होतंय. त्यात, शेतकरी कर्जमाफी, कायदा-सुव्यवस्था, झोपू योजनेतील घोटाळा यासारख्या महत्त्वाच्या विषयांवरून विरोधक सरकारची कोंडी करतील, असं बोललं जात होतं. परंतु, आज विरोधकांचा वेगळाच 'रागरंग' दिसला.

राज्य सरकारनं प्रथेप्रमाणे विरोधकांना चहापानाचं आमंत्रण दिलंय. या चहापानाला ते जाणार की प्रथेप्रमाणेच बहिष्कार टाकणार, याकडे सगळ्यांचं लक्ष लागलं होतं. अशातच, विरोधी पक्षनेत्यांच्या घरी होणाऱ्या बैठकीला अनुपस्थित राहून राष्ट्रवादीनं अचानाक 'एकला चालो रे'चा पवित्रा घेतला. एरव्ही, विधानसभा आणि विधान परिषदेचे विरोधी पक्षनेते एकत्र पत्रकार परिषद घेऊन आपली भूमिका मांडतात. मात्र यावेळी राधाकृष्ण विखे पाटील यांच्या पत्रकार परिषदेतही सहभागी न होण्याचा निर्णय राष्ट्रवादीने घेतलाय. धनंजय मुंडे ४ वाजता स्वतंत्र पत्रकार परिषद घेणार असल्याचं पक्षानं जाहीर केलंय. त्यामुळे या अधिवेशनात विरोधक विरुद्ध विरोधक आणि सत्ताधारी विरुद्ध सत्ताधारी असा सामना रंगण्याचीच चिन्हं आहेत. कारण, शेतकरी कर्जमाफी, समृद्धी महामार्ग यावरून शिवसेना आक्रमक होण्याची शक्यता आहे. त्यांना मुख्यमंत्री कसे सामोरे जातात, हे पाहावं लागेल.