म. टा. विशेष प्रतिनिधी, मुंबई
मुंबईकरांची सोमवार सकाळ अधिक प्रसन्न होती. मुंबईतील काही भागांमध्ये किमान तापमानात सकाळी घट जाणवली. भारतीय हवामान विभागाने वायव्य आणि मध्य भारतात काही ठिकाणी किमान तापमानात घट होईल, असा अंदाज वर्तवला होता. त्यानुसार राज्याच्या काही भागांत आणि मुंबईच्या काही भागांमध्ये तापमानात घट जाणवली. त्यामुळे यंदा ऑक्टोबर हीटचे चटके न बसता थेट थंडीच अनुभवण्यास मिळण्याचा आनंद मुंबईकरांना होत आहे.
सांताक्रूझचे किमान तापमान रविवारपेक्षा काही अंशांनी खाली घसरून सोमवारी २२.७ अंश सेल्सिअस तापमानाची नोंद झाली. तर कुलाबा येथे हे तापमान २३.५ अंश सेल्सिअस होते. कुलाब्याचे तापमान रविवारइतकेच नोंदले गेले असले तरी उपनगरांमध्ये आणि नवी मुंबईमध्ये तापमान सरासरीपेक्षा किंचित खाली घसरले. त्यामुळे ही थंडीची चाहूल असल्याची जाणीव झाली. बोरिवली पूर्वेला सोमवारी सकाळी सर्वात कमी किमान तापमान नोंदले गेले. पारा २० अंशांपेक्षा खाली घसरला होता. बोरिवलीमध्ये १९.७५ अंश सेल्सिअस तापमान नोंदले गेले, तर माझगाव, वांद्रे-कुर्ला संकुल, गोरेगाव, विद्याविहार, पवई, मुलुंड पूर्व येथे सरासरीहून कमी तापमान होते. नेरुळ आणि पनवेल येथेही किमान तापमान सरासरीहून कमी होते. सकाळी फिरायला जाणाऱ्यांना सोमवारी वातावरणात होत असलेल्या बदलाचीही हळुहळू जाणीव व्हायला लागली आहे. रविवारी वरळी येथे कमाल तापमान ३० अंशांपेक्षा कमी नोंदले गेले. उर्वरित मुंबईत मात्र हे तापमान ३० अंशांच्या वर आहे. सांताक्रूझ येथे ३३.६ तर कुलाब्यात ३४ अंश कमाल तापमान सोमवारी नोंदवले गेले. रविवारच्या तुलनेत आर्द्रतेनेही सोमवारी दिलासा दिला आहे. कुलाबा येथे ७१ टक्के आर्द्रता होती, तर सांताक्रूझ येथे ६४ टक्के आर्द्रता होती. त्यामुळे उन्हाचा तापही काहीसा कमी जाणवला.
राज्यातील तापमान सरासरीपेक्षा अधिक
राज्यातही कमाल तापमानामध्ये फारसा दिलासा नाही. हे तापमान अजूनही ३० अंशांच्या वरच आहे. मात्र, किमान तापमानात फरक जाणवायला सुरुवात झाली आहे. माथेरान येथे सोमवारी सकाळी १८ अंशांच्या आसपास पारा होता. नाशिकचे तापमानही खाली उतरले आहे, तर अहमदनगर येथे किमान तापमान १४ अंश सेल्सिअस होते. महाबळेश्वर, औरंगाबाद, उस्मानाबाद, परभणी, गोंदिया, नागपूर येथे तापमान सरासरीपेक्षा कमी होते. येत्या दोन ते तीन दिवसांमध्ये वायव्य भारत, मध्य भारत आणि पूर्व भारत येथे तापमानाचा पारा आणखी खाली उतरण्याचा अंदाज भारतीय हवामान विभागाने वर्तवला आहे. तसेच हलक्या ते मध्यम स्वरूपाचे धुकेही जाणवण्याची शक्यता आहे.