Coronavirus Update: चिंता वाढली... मुंबईत सर्वाधिक करोना संसर्ग कुणाला?, नव्या अभ्यासातून मोठी माहिती समोर

म. टा. विशेष प्रतिनिधी, मुंबई ः करोना बाधितांमध्ये सर्वाधिक रुग्णसंख्या ही तरुणांचीच असल्याचे दिसून येत आहे. करोनामुळे मृत्यू झालेल्यांमध्ये सहआजार असलेल्या ज्येष्ठ नागरिकांची संख्या सर्वाधिक आहे. पालिकेने दिलेल्या माहितीनुसार मुंबईमध्ये ३० ते ३९ या वयोगटामध्ये करोना संसर्गाची लागण झालेल्या रुग्णांची संख्या सर्वाधिक म्हणजे २२ लाख ४३ हजार ३८९ इतकी असून ४० ते ४९ या वयोगटामध्ये करोना संसर्ग झालेल्या रुग्णांची संख्या १ लाख ८८ हजार ७७४ इतकी नोंदवण्यात आली आहे. २० ते २९ या गटात १ लाख ८२ हजार ८०६ जणांना करोनाची लागण (Covid-19 Cases in Maharashtra) झाली आहे. मागील चारही लाटांमध्ये तरुण वर्गात संसर्गाची लागण झाल्याचे दिसून येते.

शिक्षण, नोकरी तसेच सार्वजनिक ठिकाणी कामानिमित्त असलेला वावर तरुणांमध्ये सर्वाधिक असल्याने त्यांच्यामध्ये संसर्ग होण्याची शक्यताही अधिक असते. राज्यासह मुंबईमध्ये पुरुषांमध्ये स्त्रियांच्या तुलनेत संसर्ग झालेल्या रुग्णांची संख्या अधिक आहे. ५० ते ७९ या वयोगटामध्ये संसर्गामुळे मृत्यू झालेल्यांची संख्या सर्वाधिक आहे. ६० ते ६९ या वयोगटात ५२७३ तर ५० ते ५९ या वयोगटात ३९४२ जणांचा करोनाने बळी घेतला आहे. २० ते २९ या गटात २३७ तर ३० ते ३९मध्ये ६७४ जणांना करोनामुळे प्राण गमवावे लागले आहेत.

सेव्हन हिल्समध्ये नवा अभ्यास

चौथ्या लाटेमध्ये किती रुग्णांना संसर्गाची लागण झाली, त्यांचा वयोगट काय होता, संसर्ग किती वेळा झाला, या सर्व मुद्द्यांवर पालिकेच्या सेव्हन हिल्स रुग्णालयामध्ये अभ्यास करण्यात येणार आहे. संसर्ग रोखण्यासाठीचा लसीकरणाची गरज, त्याचा प्रभाव आणि या लाटेमध्ये मृत्यू टाळण्यासाठी झालेला लाभ अशा विविध स्तरांवर हा अभ्यास केला जाईल, असे रुग्णालयाचे अधिष्ठाता डॉ. बाळकृष्ण अडसूळ यांनी सांगितले.

राज्य कोविड टास्क फोर्स टांगणीला?, सत्ताबदल झाल्यानंतर राजीनाम्याबाबत जोरदार चर्चा

मुंबईतील चित्र

वयोगट - रुग्णसंख्या

०-९ : २२,९४८

१०-१९ : ५९,७७१

२०-२९ : १,८२,८०६

३०-३९ : २,२४,३८९

४०-४९ : १,८८,७७४

५०-५९ : १,७५,२१०

६०-६९ : १,२८,००९

७०-७९ : ७४,००५

राज्यात करोनाने सहा मृत्यू

महाराष्ट्रात मंगळवारी ४२०७ करोना बाधित रुग्ण बरे होऊन घरी परतले आहेत. त्यातुलनेत राज्यात दिवसभरात ३१९८ नवीन करोना बाधित रुग्णांचे निदान झाले. गेल्या २४ तासांत राज्यात सहा करोना रुग्णांच्या मृत्यूची नोंद करण्यात आली असून, यात मुंबई, वसई-विरार, पुणे, सोलापूर आणि रत्नागिरी येथील प्रत्येकी एका रुग्णाचा समावेश आहे. सध्या राज्यात २० हजार ८२० करोना बाधित रुग्णांवर उपचार सुरू आहेत.

मुंबई महापालिकेच्या हद्दीत मंगळवारी ६५९ नवीन रुग्णांचे निदान झाले. यामुळे मुंबईतील आजपर्यंतची करोना रुग्णांची एकूण संख्या ११ लाख १५ हजार २१० इतकी झाली. गेल्या २४ तासांत मुंबईत एका करोना बाधित रुग्णाचा मृत्यू झाला. यामुळे मुंबईत करोनामुळे दगावलेल्या रुग्णांची आजपर्यंतची एकूण संख्या १९ हजार ६२० इतकी आहे. राज्यात ही संख्या १ लाख ४७ हजार ९४९ आहे.

ठाणे जिल्ह्यात ३४८ नवे रुग्ण

ठाणे : जिल्ह्यात मंगळवारी करोनाचे नवे ३४८ रुग्ण आढळले. या रुग्णवाढीनंतर जिल्ह्यातील रुग्णांची एकूण संख्या ७ लाख ३० हजारांवर पोहोचली आहे. दिवसभरात आढळलेल्या एकूण रुग्णांपैकी ठाणे १०५, कल्याण-डोंबिवली ६१, नवी मुंबई १२३, उल्हासनगर ६, भिवंडी २, मिरा-भाईंदर २०, बदलापूर ३, ठाणे ग्रामीणमध्ये २८ नवीन रुग्णांची नोंद झाली आहे. सध्या जिल्ह्यातील उपचाराधीन रुग्णांची संख्या ३ हजार ९८२ इतकी आहे.