मुंबईतील करोना रुग्णसंख्येत झपाट्याने होणाऱ्या वाढीने काळजीत भर, अशी आहे सद्यस्थिती

म. टा. विशेष प्रतिनिधी, मुंबई : करोना रुग्णांची संख्या अधिक झपाट्याने वाढत असून शुक्रवारी मुंबईत नव्या बाधितांच्या संख्येने १९००चा टप्पा पार केला आहे. मुंबईमध्ये १,९५६ नव्या बाधितांची नोंद झाली आहे. त्यातील ८३ जणांना रुग्णालयामध्ये दाखल करावे लागले असून तिघांना ऑक्सिजनची आवश्यकता भासली.

करोनावर मात करून बऱ्या झालेल्या रुग्णांची संख्या ७५६ इतकी असून रुग्णालयामध्ये दाखल कराव्या लागलेल्या रुग्णांची टक्केवारी १.४८ टक्के इतकी आहे. रुग्णसंख्या वाढत असली तरीही कोणत्याही प्रकारची करोना लक्षणे नसलेल्या रुग्णांची संख्या १,८७३ आहे. टक्केवारीमध्ये हे प्रमाण ९६ टक्के आहे.

मुंबई, पुणे येथे करोना चाचण्यांचा वेग वाढवल्यामुळे अधिक रुग्णांची नोंद झाली आहे. पालिकेने शुक्रवारी १५,३४६ चाचण्या केल्या असून आतापर्यंत मुंबईमध्ये १,७२,६०,१७२ चाचण्या करण्यात आल्या आहेत. करोना रुग्णांची संख्या वाढती असल्याने वांद्रे कुर्ला कॉम्प्लेक्स, मालाड आणि वरळी (एनएससीआय) येथील जम्बो करोना केंद्रे सुरू करण्याचा निर्णय घेण्यात आला आहे.

अशी आहे मुंबईतील स्थिती

मुंबईत बरे झालेल्या रुग्णांचा दर - ९७ टक्के

मुंबईतील रुग्ण दुपटीचा दर - ६४२ दिवस

नवे बाधित रुग्ण - १९५६

लक्षणे नसलेल्या रुग्णांची संख्या - १,८७३ (९६ टक्के)

रुग्णालयात दाखल केलेले रुग्ण - ८३

ऑक्सिजन खाटांवरील रुग्णांची संख्या - ३

राज्यात ३,०८१ रुग्णांची भर

राज्यात शुक्रवारी ३,०८१ नवीन करोना बाधितांचे निदान झाले, तर दिवसभरात १,३२३ रुग्ण बरे होऊन घरी परतले. राज्यात सध्या १३,३२९ उपचाराधीन रुग्ण आहेत, अशी माहिती राज्य सरकारच्या आरोग्य विभागाने दिली.

मुंबई महापालिकेच्या हद्दीत शुक्रवारी १,९०६ नवीन करोनाबाधितांचे निदान झाले. मुंबईसह राज्यात दिवसभरात एकही करोनारुग्णाच्या मृत्यूची नोंद झालेली नाही. तर, ठाणे जिल्ह्यात ५३१ नवे करोनारुग्ण आढळले. जिल्ह्यात सध्या २,०२८ उपचाराधीन रुग्ण आहेत. ठाणे महापालिका क्षेत्रात २१४, कल्याण-डोंबिवली ४६, नवी मुंबई १९१, उल्हासनगर ६, मिरा-भाईंदर ५६, ठाणे ग्रामीण ९ इतके रुग्ण आढळले आहेत.