म. टा. विशेष प्रतिनिधी, मुंबई
मुख्यमंत्री उद्धव ठाकरे यांचे निवासस्थान असलेला कलानगरचा परिसर महापालिकेने सील केलेला असतानाच भायखळा येथील शिवसेनेच्या आमदार यामिनी जाधव आणि पालिकेच्या स्थायी समितीचे अध्यक्ष यशवंत जाधव यांच्या निवासस्थानापर्यंत करोना पोहोचला आहे. जाधव यांचे निवासस्थान असलेल्या माझगाव येथील सेंट मेरी रोडवरील एका इमारतीतील करोनाग्रस्ताचा मृत्यू झाला आहे. त्यामुळे हा संपूर्ण परिसर पालिकेने सील केला आहे.
माझगाव येथील सेंट मेरी रोड येथील हुसैन इमारतीत एकाचा करोनामुळे दोन दिवसांपूर्वी मृत्यू झाला. ही व्यक्ती दुबईवरून प्रवास करून आली होती. त्याला ताप, खोकला येत असल्यामुळे प्रिन्स अली रुग्णालयात दाखल केले होते. त्यानंतर तिथून परळच्या ग्लोबल रुग्णालयात दाखल केले होते. तिथे उपचारादरम्यान त्याचा मृत्यू झाला. खबरदारीचा उपाय म्हणून पालिकेने हुसैन इमारत सील करून आसपासचा परिसर बाधित क्षेत्र म्हणून जाहीर केला आहे. हुसैन इमारतीसमोरच बिलाकडी चेंबर टॉवरमध्ये जाधव यांचे निवासस्थान आहे.
पालिकच्या वतीने या परिसरात जंतुनाशक फवारणी करण्यात आली आहे. मृताच्या निकटच्या संपर्कातील नातेवाईकांसह लोकांना क्वारंटाइनमध्ये पाठवण्यात असून त्या सर्वांचे स्वॅब घेण्यात आले आहे. त्यांचा चाचणी अहवाल प्रलंबित असल्याचे पालिकेने स्पष्ट केले आहे.