माणसांपासून प्राण्यांना करोनाचा संसर्ग होत नाही; अभ्यासातून निष्कर्ष

म. टा. विशेष प्रतिनिधी, मुंबई

करोना आजारावर मात करून बऱ्या झालेल्या व्यक्तींच्या घरी असलेल्या पाळीव प्राण्यांच्या अभ्यासामध्ये या प्राण्यांना करोनाची लागण न झाल्याचे दिसून आले आहे. या आजाराचा संसर्ग माणसाकडून प्राण्यांना वा प्राण्यांकडून माणसांना होऊ शकतो का, याचे अनुमान लावण्यासाठी हा अभ्यास करण्यात आला होता.

केईएम रुग्णालयाच्या सहयोगाने मिलेनियम इंडिया एज्युकेशन फाऊंडेशनच्या सहयोगाने करण्यात आलेल्या या अभ्यासासाठी निवड केलेल्या मांजर तसेच कुत्रा या पाळीव प्राण्यांमध्ये करोनाबाधित व्यक्तींकडून संसर्ग झाला नसल्याचे दिसून आल्याचे पशुवैद्यकीय तज्ज्ञ डॉ. उदय ककरु यांनी सांगितले. प्राण्यांमध्ये संसर्ग होत असला तरी प्राण्यांची स्वतःची विकसित प्रतिकारशक्ती असते. त्यामुळे हा संसर्ग अतिशय सौम्य प्रकारचा असेल, अशी शक्यता पशुवैद्यकीय तज्ज्ञ व्यक्त करत आहेत. मात्र माणसांप्रमाणे प्राण्यांचा बाहेरचा वावर लक्षात घेता त्यांचेही करोनाच्या आजारापासून संरक्षण करण्यासाठी वैद्यकीय उपाययोजना करायला हव्यात. त्यांचे पाय धुणे, अंग स्वच्छ पुसून घेण्यामध्ये नियमितता हवी, याकडेही पशुवैद्यकांनी लक्ष वेधले आहे.

मुंबईमध्ये झालेल्या या अभ्यासानंतर दिल्लीमधील रुग्णालयामध्येही हा अभ्यास करण्यात येणार आहे. या प्राण्यांचे स्वॅब घेण्यात आले होते, त्याची तपासणी केल्यानंतर हे निष्कर्ष समोर आले आहेत. वेगवेगळ्या प्रकारचे ताप तसेच इतर काही संसर्गजन्य आजार हे प्राण्यांकडून माणसांना होऊ शकतात, असेही दिसून आले आहे. करोना संसर्गाची शक्यता अधिक असलेले तसेच ज्या ठिकाणी करोनाचे रुग्ण सर्वाधिक सापडले अशा ठिकाणचे नमुने चाचण्यांसाठी घेण्यात आले होते. गोळा करण्यात आलेले नमुन्यांचे प्रमाण मर्यादित असले तरी त्यातून पुढे आलेले निष्कर्ष निश्चितपणे साह्यभूत ठरतील, असा विश्वास डॉ. ककरु यांनी व्यक्त केला.