काळजी घ्या! मुली, महिलांमध्ये करोनाचा संसर्ग वाढता

म. टा. विशेष प्रतिनिधी, मुंबईः पुरुषांच्या तुलनेमध्ये महिलांमध्ये लसीकरणाचे प्रमाण कमी असताना मुंबईमध्ये लहान वयोगटातील मुली तसेच महिलांमध्ये संसर्ग होण्याचे प्रमाण वाढले असून विविध वयोगटामध्ये ते ३२ ते ४५ टक्क्यांपर्यंत असल्याचे दिसते. पालिकेने दिलेल्या माहितीनुसार मुंबईमध्ये ३० ते ४९ या वयोगटामध्ये करोनाबाधित रुग्णांची संख्या शहरात सर्वाधिक असून ३०-३९ या वयोगटामध्ये स्त्रियांमध्ये ३७ टक्के संसर्गाचे प्रमाण दिसते. ४० ते४९ या वयोगटामध्ये महिलांमध्येही हे प्रमाण तितकेच आहे. ० ते ९ वयोगटामध्ये मुलीमध्ये ४५ टक्के तर, १० ते १९ वयोगटातील किशोरवयीन मुलींमध्ये हे प्रमाण ४४ टक्के आहे.

करोना संसर्गाची सुरवात झाली तेव्हा महिलांमध्ये पुरुषांच्या तुलनेमध्ये संसर्गाचे प्रमाण कमी होते. नोकरी रोजगाराच्या तसेच इतर कारणांनी घराबाहेर जाणाऱ्या पुरुषांची संख्या महिलांच्या तुलनेमध्ये अधिक आहे, त्यामुळेही संसर्ग होण्याची शक्यताही या गटात अधिक दिसून येते, असे संसर्गजन्य आजाराचे तज्ज्ञ डॉ. वरद मोहिते यांनी सांगितले. २० ते २९ या वयोगटात ४० तर ६० ते ६९ व ७० ते ७९ या वयोगटामध्ये महिलांमध्ये संसर्गाचे प्रमाण ४२ टक्के असल्याचे दिसते. ८० ते ८९ या वयोगटामध्ये हे प्रमाण ४३ टक्के नोंदवण्यात आले आहे. अनेक महिलांनी करोनाची सौम्य स्वरुपाची लक्षणांची नोंदही केली नसल्याचे स्त्रीरोगतज्ज्ञ अनुष्का पाटील यांनी सांगितले.