करोना रुग्णामुळे हिंदुजात घबराट; ८० जण निरीक्षणाखाली

मुंबई: मुंबईत शुक्रवारी आणखी दोन करोना रुग्णांची नोंद झाली असून त्यांपैकी एक ठाणे परिसरात राहणारा आहे. त्यामुळे मुंबईतील कोरोना बाधितांची संख्या चारवर पोहचली आहे. हे चारही रुग्ण कस्तुरबा रुग्णालयात उपचार घेत आहेत. दरम्यान, मुंबईत राहत असलेल्या रुग्णाच्या परिसरातील ४६० घरांची पालिकेच्या आरोग्य विभागाने पाहणी केली. त्यांतील एकही व्यक्ती करोना बाधित नसल्याची माहिती पालिकेच्या आरोग्य विभागाच्या उप कार्यकारी अधिकारी डॉ. दक्षा शहा यांनी दिली. दरम्यान, हिंदुजा रुग्णालयात करोनाच्या रुग्णामुळे मोठा गोंधळ उडाला.

करोना रुग्णांच्या संपर्कात आलेल्या सात व्यक्तींची तपासणी करण्यात आली. या व्यक्ती रुग्णांच्या कमी संपर्कात आल्यामुळे त्यांना त्यांच्या घरी १४ दिवस डॉक्टरांच्या निगराणीखाली ठेवण्यात आले आहे. गंभीर स्थितीत असलेल्या रुग्णांना आयसीयू सेवा मिळण्यासाठी वैद्यकीय महाविद्यालयात सोय करण्यात आली आहे. तर बाधित देशातून येणाऱ्या प्रवाशांना वेगळे ठेवण्यासाठी सेव्हन हिल्स रुग्णालयात सोय करण्यात आली आहे. ३० खाटांचा विलगीकरण कक्षही उपलब्ध करून देण्यात आला आहे.


‘त्या’ रुग्णामुळे गोंधळ

१२ मार्च रोजी करोनाचे निदान झालेल्या दोन रुग्णांपैकी दुसऱ्या रुग्णाला हिंदुजा रुग्णालयामध्ये दाखल करण्यात आले होते. आता त्यास कस्तुरबा रुग्णालयात हलवण्यात आले आहे. या रुग्णाची प्रकृती स्थिर आहे. मात्र, हिंदुजामध्ये या रुग्णाच्या संपर्कात आलेल्या वैद्यकीय कर्मचारी आणि इतर रुग्णांपैकी आठ जणांचे थुंकीचे नमुने (स्वॅब) हे तपासणीसाठी कस्तुरबा पीसीआर लॅबमध्ये पाठवण्यात आले असून, इतर ७४ व्यक्तींना घरांतच स्वतंत्र ठेवण्यात आले आहे. त्यांनाही चौदा दिवस निरीक्षणाखाली ठेवण्यात आल्याचे पालिकेच्या आरोग्य विभागाने स्पष्ट केले.

२३३ खाटांची सोय

कस्तुरबा रुग्णालय- ७८

एचबीटी रुग्णालय- २०

भाभा रुग्णालय कुर्ला- १०

भाभा रुग्णालय वांद्रे- १०

राजावाडी- २०

फोर्टिस- १५

बीपीटी रुग्णालय- ५०

बाबासाहेब आंबेडकर मध्य रेल्वे रुग्णालय- ३०