धोका कायम! मुंबईत आज ४१ करोनाबाधितांचा मृत्यू; १३७२ नवे रूग्ण

मुंबई: रुग्ण दुपटीनं वाढण्याचा कालावधी १४.५ दिवसांवर गेल्याचं प्रशासनाकडून सांगण्यात येत असलं तरी, मुंबईवरील करोनाचं संकट कायम आहे. शहर आणि उपनगरांत आज दिवसभरात ४१ करोनाबाधितांचा मृत्यू झाला. तर १३७२ नवीन रुग्णांची नोंद झाली आहे. त्यामुळं मुंबईतील एकूण करोनाबाधित रुग्णांची संख्या २३,९३५ झाली आहे.

मुंबईतील करोनाचा प्रादुर्भाव कमी करण्यासाठी आरोग्य यंत्रणा, महापालिका प्रशासन सर्वतोपरी प्रयत्न करत आहे. मात्र, त्यावर अद्याप हवे तसे नियंत्रण मिळवता आलेले नसल्याचे आकडेवारीवरून दिसते. मुंबईत आज, बुधवारी दिवसभरात १३७२ नवीन रुग्णांची नोंद झाली आहे. त्यामुळे मुंबईतील रुग्णांची एकूण संख्या २३,९३५वर पोहोचली आहे. आजच्या नवीन रुग्णांमध्ये १५० रुग्णांचे अहवाल आज प्राप्त झाले असून, ते पॉझिटिव्ह आहेत. त्यांची करोना चाचणी १७ ते १८ या दोन दिवसांत करण्यात आली होती, असं महापालिकेकडून सांगण्यात आले. तर आज दिवसभरात ४१ रुग्णांचा मृत्यू झाला आहे. त्यापैकी १५ मृत्यू हे ६ ते १५ मे या कालावधीत झालेले आहेत. त्यांचा अंतर्भाव आजच्या अहवालात करण्यात आला आहे. ४१ पैकी ३२ रुग्णांना काही अतिजोखमीचे आजार होते. मृत्यू झालेल्या रुग्णांमध्ये २९ पुरूष तर १२ महिला होत्या. एका रुग्णाचे वय ४० वर्षांखालील होते. तर १८ जणांचे वय ६० वर्षांवरील होते. तर उर्वरित २२ जणांचे वय हे ४० ते ६० वर्षे वयोगटातील होते.

राज्यात आज ६५ करोनाबळी; रुग्णसंख्या ४० हजारच्या उंबरठ्यावर


मुंबईत आज दिवसभरात ८२६ संशयित रुग्ण विविध रुग्णालयांत उपचारासाठी दाखल झाले आहेत. ही संख्या २१,७०७ वर पोहोचली आहे. दिलासादायक बाब म्हणजे कोविड १९ या आजारातून आज ३५० रुग्ण बरे झाले असून, त्यांना रुग्णालयातून घरी सोडण्यात आले आहे. त्यामुळे बरे झालेल्यांची संख्या ६,४६६ इतकी झाली आहे.

मुंबई: करोनामुळे पोलिसाचा मृत्यू झाल्यास कुटुंबीयांना मिळणार ₹ ६५ लाख

झोपडपट्टी, कंटेन्मेंट झोनमध्ये आरोग्य तपासणी शिबीर

झोपडपट्टी आणि प्रतिबंधित क्षेत्रांमध्ये आरोग्य तपासणी शिबीर आयोजित करण्यात येत आहेत. आतापर्यंत ३५७ शिबिरे आयोजित केलेली आहेत. त्यात १८,६४३ जणांना अतिजोखमीचे आजार असल्याचे स्पष्ट झाले आहे. ५, १८८ जणांचे स्वॅब नमुने तपासणीसाठी घेण्यात आले आहेत. त्यातील ६८३ जणांना करोनाची लागण झाल्याचं स्पष्ट झालं आहे. या बाधितांचे विलगीकरण करण्यात आले असून, त्यांच्यावर उपचार सुरू आहेत, अशी माहिती महापालिकेने दिली.