पडेल ते काम करण्याची तयारी ठेवा: सुभाष देसाई

मुंबई: एप्रिलपासून राज्यात अर्थचक्र सुरू झालं आहे. आतापर्यंत राज्यात ५५ हजार २४५ उद्योगांनी उत्पादन सुरू केलं असून १३ लाख ८६ हजार कामगार कामावर रुजू झाले आहेत, असं सांगतानाच परराज्यातील मजूर आपल्या गावी गेले आहेत. त्यामुळे राज्यातील तरुणांनी कुठलंही काम करण्याची तयारी ठेवावी, असं आवाहन राज्याचे उद्योग मंत्री सुभाष देसाई यांनी केलं आहे.

एका वृत्तवाहिनीशी संवाद साधताना उद्योगमंत्री सुभाष देसाई यांनी हे आवाहन केलं. परराज्यातील मजूर आपआपल्या राज्यात गेले आहेत. त्यामुळे स्थानिकांना रोजगार मिळावा म्हणून सरकारकडून उपाययोजना करण्यात येत आहेत. त्याचाच एक भाग म्हणून आम्ही महाराष्ट्र एम्प्लॉयमेंट ब्यूरो या नावाचं एक पोर्टल सुरू करत आहोत. या पोर्टलवर तरुणांनी नोंदणी करायची आहे. त्यानंतर त्या त्या उद्योगांची गरज पाहून उद्योगांना मनुष्यबळ पुरवलं जाणार आहे. त्यामुळे तरुणांनी मिळेल ते काम करण्याची तयारी ठेवावी, असं सांगतानाच ज्या ठिकाणी करोनाचा अधिक प्रादुर्भाव नाही, अशा ठिकाणी या महिन्यात आणखी उद्योग सुरू केले जाणार आहेत, असं देसाई यांनी सांगितलं.

'निसर्ग'ग्रस्त रायगडला 'ऑन द स्पॉट' दिलासा; १०० कोटींची मदत जाहीर

रायगडच्या दिघी येथे १५ हजार एकरावर एमआयडीसी उभी राहत आहे. माणगाव एमआयडीसी असं तिचं नाव असेल. या एमआयडीसीत देशी-विदेशी गुंतवणूक होणार असून त्या दिशेने चर्चा सुरू करण्यात आलेली आहे. माणगाव एमआयडीसीत इंजिनियरिंग, औषध उत्पादन, इलेक्ट्रॉनिक्स आदी विविध रोजगार उभे राहणार असल्याने या ठिकाणी हजारो नोकऱ्या उपलब्ध होणार आहेत. त्याचा राज्यातील तरुणांना फायदाच होणार असल्याचंही त्यांनी सांगितलं.

आठवड्यातून एकदा ऑफिसला या, अन्यथा पगार कापणार; सरकारचे आदेश