सलून, पार्लरसंदर्भात सोशल मीडियावरील अधिसूचना फेक, राज्य सरकारची माहिती

मुंबईः सलून, पार्लर, पार्क आणि इतर सुविधा २९ मेपासून सुरू होणार नाहीत. लॉकडाऊनच्या नियमात कुठलेही बदल केलेले नाहीत. सोशल मीडियावर व्हायरल होत असलेल्या अधिसूचना या फेक आहेत. अशा प्रकारचे कुठलेही आदेश देण्यात आलेले नाहीत, असं महाराष्ट्र सरकारने स्पष्ट केलं आहे. राज्य सरकारच्या माहिती विभागाने ( MAHARASHTRA DGIPR ) यासंदर्भात ट्विट केलंय.

बगिचे, मैदानं, फूटपाथ या सार्वजनिक ठिकाणी जॉगिंग, वॉकिंग, रनिगं, सायकलिंग आणि इतर व्यायाम करण्यास पहाटे ५ ते संध्याकाळी ७ वाजेपर्यंत महाराष्ट्र सरकारने परवानगी दिली आहे. सायकलिंग केल्यास सोशल डिस्टन्सिंगचे पालन होईल, अशा प्रकारच्या फेक अधिसूचना सोशल मीडियावर व्हारल होत आहेत.

तसंच शुक्रवार २९ मेपासून सलून आणि ब्युटी पार्लर सुरू करण्याचा निर्णय राज्य सरकारने घेतला आहे, असाही मेसेज अधिसूचनेसह सोशल मीडियावर व्हायरल होतोय. त्यासाठी आवश्यक असणारे नियमही नमुद करण्यात आले आहेत. मात्र सोशल मीडियावरील या अधिसूचना फेक आहेत. त्यात कुठलीही सत्यता नाहीए, असं राज्य सरकारच्या डीजीआयपीआरनं स्पष्ट केलं आहे.