आषाढीवारी निर्बंधमुक्त!, आरोग्यमंत्री राजेश टोपेंनी दिली माहिती

म. टा. प्रतिनिधी, मुंबई ः लक्षावधी वारकऱ्यांचे श्रद्धास्थान असलेल्या विठ्ठल रखुमाईच्या दर्शनासाठी पंढरपूरला जाणाऱ्या भाविकांचा उत्साह यंदा मोठा आहे. दोन वर्षांनंतर यंदा करोना निर्बंधमुक्त आषाढीवारी होणार असून सुमारे १५ लाखांहून अधिक वारकरी त्यात सहभागी होणार आहेत. आषाढीवारीचे संयोजन शेवटच्या टप्प्यात असून, सध्या करोना रुग्णांची संख्या वाढत असली तरी योग्य काळजी घेऊन वारी पार पडेल, अशी माहिती आरोग्यमंत्री राजेश टोपे यांनी सोमवारी मंत्रिमंडळ बैठकीनंतर दिली आहे.

दोन वर्षांच्या खंडानंतर काही दिवसांतच आषाढीवारीला सुरुवात होणार आहे. करोना प्रतिबंधाची काळजी घेऊन आषाढीवारी यशस्वी पार पाडली जाईल, असे टोपे यांनी सांगितले. सोमवारी मुंबईत झालेल्या राज्य मंत्रिमंडळाच्या बैठकीत आषाढीवारीच्या आयोजनाबाबत चर्चा झाली. मुंबई, पुणे, ठाणे, पालघर, रायगड आणि नवी मुंबई या शहरांमध्ये नवीन करोनाबाधित रुग्णांची संख्या सातत्याने वाढत आहे. त्यावरही मंत्रिमंडळाच्या बैठकीत चर्चा झाली असून, वाढत्या रुग्णसंख्येबाबत चिंता व्यक्त करण्यात आली. जास्तीत जास्त नागरिकांनी लशीची बूस्टर मात्रा घ्यावी, असे आवाहन टोपे यांनी केले आहे.

सामाजिक न्याय मंत्री धनंजय मुंडे यांना करोनाची काही लक्षणे जाणवत आहेत. मात्र अद्याप त्यांचा चाचणी अहवाल पॉझिटिव्ह आलेला नाही. विरोधी पक्षनेते देवेंद्र फडणवीस यांना करोनाची लागण झाली आहे, असे ते म्हणाले. निर्माता, दिग्दर्शक करण जोहर यांच्या घरी वाढदिवसाच्या पार्टीनंतर अनेक कलाकारांना करोना झाला, याकडे आरोग्यमंत्र्यांनी लक्ष वेधले.