करोनाचा धसका; महावितरणमध्ये बायोमॅट्रिक हजेरी बंद

मुंबई: चीनमध्ये धुमाकूळ घातलेल्या करोना व्हायरसचे भारतातही रुग्ण आढळले आहेत. महाराष्ट्रात नाशिक आणि सोलापूरमध्ये करोनाचे संशयित रुग्ण आढळल्याने राज्यातही भीतीचं वातावरण निर्माण झालं आहे. या पार्श्वभूमीवर महावितरण कंपनीने करोनाचा संसर्ग होऊ नये म्हणून त्यांच्या सर्व कर्मचाऱ्यांची बायोमॅट्रिक हजेरी काही काळासाठी बंद केली आहे. तसं परिपत्रकही काढण्यात आलं आहे.

महावितरण कंपनीचे मुख्यव्यवस्थापक कमांडर शिवाजी इंदलकर यांनी आजच हे परिपत्रक जारी केलं. जगभरातील देशांमध्ये करोना विषाणूचा संसर्ग वाढला आहे. त्यामुळे अनेक ठिकाणी जीवित हानी होत आहे. हा विषाणू संसर्गजन्य असल्याने अनेक खासगी कंपन्यांकडून त्यांच्या कर्मचाऱ्यांना खबरदारीचा उपाय घेण्यास सांगण्यात येत आहे. त्यामुळे महावितरणनेही काही उपाय योजले आहेत. खबरदारीचा उपाय म्हणून पुढील आदेश येईपर्यंत महावितरणच्या सर्व कार्यालयातील बायोमॅट्रीक हजेरी बंद करण्यात येत आहे, असं इंदलकर यांनी म्हटलं आहे. सर्व कर्मचाऱ्यांची उपस्थिती हजेरी पत्रकात नोंदवली जाणार असून हे परिपत्रक तात्काळ लागू करण्यात येत असल्याचंही परिपत्रकात म्हटलं आहे.

करोनाची भीती; बराक ओबामा म्हणतात, मास्क सोडा....!

लेटलतिफांचं फावणार

दरम्यान, राज्य सरकारने सर्व सरकारी कर्मचाऱ्यांना पाच दिवसांचा आठवडा सुरू करून पाच दिवसही झाले नाही, तोच महावितरणने हे परिपत्रक काढल्याने लेटलतिफांचं फावण्याची शक्यता आहे. पाच दिवसांचा आठवडा सुरू केल्यानंतरही अनेकजण वेळेवर येत नव्हते. त्यात आता बायोमॅट्रिक हजेरी बंद करण्यात आल्याने लेटलतिफांची काही दिवस चंगळ होण्याची शक्यता वर्तविण्यात येत आहे. दरम्यान, राज्यातील अनेक खासगी कंपन्या आणि अस्थापनांनी करोना व्हायरसची धास्ती घेतली आहे. अनेक खासगी कार्यालयात कर्मचाऱ्यांना कार्यालयात येताच सॅनिटायझरने हात स्वच्छ करण्यास सांगण्यात येत आहेत.



'या' पुस्तकात झाली होती करोनाची भविष्यवाणी!

'करोना'चे थैमान; जगभरात ३,१०० बळी