करोनाला पराभूत करु.... शंभरीतील दाम्पत्य उतरले मदतकार्यात

म. टा. विशेष प्रतिनिधी, मुंबई

करोनाविरोधात सर्वच पातळीवर लढा सुरू असताना त्यात सामान्य नागरिकही मागे नाहीत. विलेपार्ले येथे राहणाऱ्या आणि शंभरीच्या घरात पोहोचलेल्या दत्ता आणि आशा गांधी या निवृत्त शिक्षक दाम्पत्याने आपले एक महिन्याचे ४० हजार रुपयांचे निवृत्तीवेतन करोनाविरोधात लढण्यासाठी मुख्यमंत्री सहाय्यता निधीसाठी देऊन समाजासमोर एक आदर्श निर्माण केला आहे.

दत्ता गांधी (९७) आणि आशा गांधी (९०) हे दाम्पत्य विलेपार्ले परिसरात राहते. दत्ता गांधी हे गोरेगावच्या नंदादीप शाळेतून, तर आशा या खार येथील बीपीएम शाळेतून मुख्याध्यापक म्हणून निवृत्त झाले आहेत. दोघांनीही राष्ट्रसेवा दलात काम केले असून त्यांच्यावर साने गुरुजींचे सामाजिक कार्याचे संस्कार आहेत. महात्मा गांधी, डॉ. बाबासाहेब आंबेडकर, एस. एम. जोशी, डॉ,. सर्वपल्ली राधाकृष्णन यांच्यासह विविध मान्यवरांनी गांधी यांच्या सामाजिक वृत्तीचे कौतुक केले आहे.

महाराष्ट्रावर करोनाचे संकट आल्यामुळे सरकारी पातळीवर उपाययोजनांसाठी मोठ्या प्रमाणावर प्रयत्न सुरू आहेत. त्यात आपल्याकडूनही काही तरी खारीचा वाटा उचलला जावा या भावनेतून गांधी दाम्पत्याने प्रत्येकी २० हजार असे दोघांचे मिळून ४० हजार रुपये निवृत्तीवेतन मुख्यमंत्री सहाय्यता निधीसाठी दिले आहेत. 'वय झाले असले तरी प्रकृतीच्या फारशा कुरबुरी नाहीत. आमच्या तिन्ही मुली आमची व्यवस्थित काळजी घेतात व मदत करतात. त्यामुळे पैसे साठवण्याची गरज भासत नाही,' असे दत्ता गांधी यांनी सांगितले.

८७ लाखांचा सामाजिक निधी

विविध सामाजिक उपक्रमांत गांधी दाम्पत्याने वैयक्तिक व समाजातून आतापर्यंत सुमारे ८७ लाख रुपये निधी गोळा करून मदत केली आहे. यामध्ये मेधा पाटकर यांची जीवनशाळा, शांतीवन, राष्ट्रसेवा दलाचे आपले घर, युसूफ मेहरअली केंद्राचे तारा सेंटर यासह विविध सामाजिक उपक्रमांचा समावेश आहे.