मुंबई, पुण्यात प्रत्येकी एक करोना रुग्ण; राज्यातील आकडा ४१ वर

मुंबई/ पुणे: राज्यातील करोनाग्रस्तांचा आकडा झपाट्यानं वाढत आहे. महाराष्ट्रात आज करोनाचा पहिला बळी मुंबईत गेला असून, आणखी एका रुग्णाला करोनाची लागण झाल्याचं स्पष्ट झालं आहे. तर पिंपरी-चिंचवडमधील एकाचा चाचणी अहवाल पॉझिटिव्ह आला आहे. त्यामुळं राज्यातील करोनाग्रस्तांचा आकडा ४१ वर पोहोचला आहे.

मुंबईत करोनाचा आणखी एक रुग्ण सापडला आहे. तो अमेरिकेहून आला आहे. तर पिंपरी-चिंचवडमध्ये आणखी एकाला करोनाची लागण झाली आहे. पुण्यातील पॉझिटिव्ह रुग्णाची संख्या १७ झाली आहे. पिंपरीमधील ही व्यक्ती अमेरिकेतून दुबईला गेली आणि नंतर मुंबईमार्गे पुण्यात आली आहे. विभागीय आयुक्त डॉ. दीपक म्हैसेकर यांनी ही माहिती दिली.

करोना: राज्यात सरकारी कार्यालये ७ दिवस राहणार बंद

इतिहासात प्रथमच विठ्ठल मंदिर बंद; जोतिबा यात्रा रद्द

परदेशवारी करून आलेल्या प्रत्येक नागरिकाची यापुढे कडक तपासणी केली जाणार आहे. घरी सोडण्यात आलेले नागरिक बाहेर फिरताना आढळून आल्यास कारवाई करण्याचा इशाराही त्यांनी दिला. पुणे आणि पिंपरी-चिंचवड शहरातील बसच्या फेऱ्या कमी करण्यात आल्या आहेत. १७१४ बस फेऱ्यांऐवजी ११३१ फेऱ्या करण्यात आल्या आहेत. ५८३ मार्गांवरील बस बंद करण्याचा निर्णय घेण्यात आला आहे, अशी माहिती त्यांनी दिली. आधार कार्ड काढणे आणि आरटीओचे परवाने देण्याचे काम बंद करण्याचे आदेश देण्यात आले आहेत, असंही त्यांनी सांगितलं.

सगळे हॉटेल बंद करणे शक्य नाही. पब आणि बार बंद करण्याचे आदेश दिले आहेत. पुढील दोन-तीन दिवस जास्त काळजी घ्यावी लागणार आहे, असं जिल्हाधिकारी नवल किशोर राम यांनी सांगितलं.