मुंबई: करोना विषाणूचा फैलाव महाराष्ट्रात होत असून, या परिस्थितीचं गांभीर्य लक्षात घेऊन मनसेनं गुढीपाडवा मेळावा रद्द करण्याचा निर्णय घेतला आहे. तसंच येत्या काही आठवड्यात महापालिकांच्या निवडणुका होणार असून, सध्याची परिस्थिती पाहता सरकारनं या निवडणुका किमान सहा महिने पुढे ढकलाव्यात, अशी मागणीही मनसेनं केली आहे.

राज्यातील नागरिकांचं आरोग्य आणि सुरक्षितता महत्वाची असून, या वर्षीचा गुढीपाडवा मेळावा रद्द करण्याचा निर्णय घेण्यात आला आहे, अशी माहिती मनसे अध्यक्ष राज ठाकरे यांनी पत्रकाद्वारे दिली आहे. राज्य सरकारनं करोनाच्या पार्श्वभूमीवर काही उपाययोजना सूचवल्या असून, त्या पुरेशा नाहीत, याकडेही राज यांनी लक्ष वेधलं आहे. मॉल्स, व्यायामशाळा, चित्रपटगृह बंद करण्याचा निर्णय घेतला आहे, काही शहरांतील शाळा बंद करण्याचा निर्णय घेतला आहे. पण चार-पाच शहरांतील शाळा बंद करून कसं चालणार, असा प्रश्न त्यांनी उपस्थित केला आहे. मुंबईत लोकलनं मोठ्या संख्येनं लोक प्रवास करतात. मोठी गर्दी होते. बसस्थानकं, बाजारपेठा यांमध्ये मोठी गर्दी होते. त्याबाबत काय करणार? सरकारनं त्यावर काय उपाय योजले आहेत, असाही प्रश्न ठाकरे यांनी केला आहे.

करोना Live: मृतांच्या कुटुंबीयांना ४ लाखांची मदत


नागपूर: 'मेयो'तून करोना संशयित ४ रुग्ण पळाले

पुढील काही आठवड्यात राज्यात काही निवडणुका होत आहेत. महापालिकांच्या निवडणुका होणार आहेत. त्यासाठी बैठका, मेळावे आणि सभा घेतल्या जातात. तेथे गर्दी होते. त्यामुळं सरकारनं गर्दी टाळण्यासाठी या निवडणुका सहा महिन्यांसाठी पुढे ढकलाव्यात अशी मागणीही त्यांनी केली. करोनाच्या रुपानं जगाववर कोसळलेलं हे संकट दूर होवो, तसंच आर्थिक संकटही टळो अशी प्रार्थनाही त्यांनी केली.