म. टा. खास प्रतिनिधी, मुंबई
सर्वसामान्य नागरिकांबरोबरच मुंबई पोलिसांमध्येही करोना विषाणूची प्रचंड दहशत आहे. नाकाबंदी, 'ड्रंक अॅण्ड ड्राइव्ह'विरोधी, बंदोबस्त यांमध्ये लोकांच्या संपर्कात येत असल्याने पोलिसांना बाधा होण्याची भीती वाटत आहे. मुख्यत्वे 'ड्रंक अॅण्ड ड्राइव्ह'विरोधी मोहिमेतील चालकांची फुंकर त्यांना जास्त धोकादायक वाटत आहे. या पार्श्वभूमीवर नागपाडा येथील पोलिस रुग्णालय आणि इतर दवाखान्यांमधील डॉक्टरांना सतर्क राहण्याच्या सूचना देण्यात आल्या आहेत.
होळी आणि धुळवडीच्या दोन दिवसांत कोणताही अनुचित प्रकार अगर घटना घडू नयेत, यासाठी मुंबईत पोलिसांचा कडक बंदोबस्त ठेवण्यात आला होता. मैदाने, चौपाट्या, समुद्रकिनारी नागरिकांनी गर्दी केली होती. या गर्दीत पोलिसांची गस्त सुरू होती. त्यातच दोन्ही दिवशी ठिकठिकाणी नाकाबंदी करून 'ड्रंक अॅण्ड ड्राइव्ह'विरोधी मोहीम मोठ्या प्रमाणात राबवण्यात आली. यावेळी तोंडावर मास्क नसल्याने पोलिस भीतीच्या सावटाखाली होते. 'ड्रंक अॅण्ड ड्राइव्ह'विरोधी महिमेत ब्रेथ अॅनालायझरवर चालकांची फुंकर घेताना पोलिसांना अधिकच भीती वाटत होती. मुंबईत अर्थसंकल्पीय अधिवेशन सुरू असून अनेक प्रश्नांसाठी आझाद मैदानात संघटनांकडून आंदोलने सुरू आहेत. याठिकाणी अनेक भागांतून लोक येत असल्याने करोनाचा फैलाव होण्याची शक्यता आहे. त्यामुळे याठिकाणी गर्दी करू अशा सूचना पोलिसांकडून आंदोलकांना दिल्या जात आहेत.
मुंबईत पोलिसांसाठी नागपाडा येथे रुग्णालय, तसेच १२ दवाखाने आहेत. करोना विषाणू झपाट्याने पसरत असल्याने यांतील वैद्यकीय अधिकारी आणि कर्मचाऱ्यांना वेळेवर उपस्थित राहण्याच्या सूचना देण्यात आल्या आहेत. पोलिस अधिकारी, कर्मचारी किंवा त्यांचे कुटुंबीय उपचारासाठी आल्यास त्यांच्यावर तत्परतेने उपचार करावेत, चालढकलपणा करू नये, असे निर्देश देण्यात आले आहेत. पोलिस आणि त्यांच्या कुटुंबीयांना सुरक्षिततेच्या दृष्टीने कोणत्या उपाययोजना कराव्यात, याबाबत मार्गदर्शन करण्यात येत आहे.