संदीप देशपांडेंना सोमवारपर्यंत पोलिस कोठडी

मुंबई: मुंबई काँग्रेसच्या कार्यालयाची तोडफोड केल्याप्रकरणी अटकेत असलेले महाराष्ट्र नवनिर्माण सेनेचे सरचिटणीस संदीप देशपांडे यांच्यासह इतर सात कार्यकर्त्यांना मुंबई किला कोर्टाने सोमवारपर्यंत पोलिस कोठडी ठोठावली आहे. संदीप देशपांडे यांच्यासह संतोष धुरी, संतोष सरोदे, अभय मालप, योगेश छिल्ले, विशाल कोकणे, हरिश सोळुंकी, दिवाकर पडवळ यांना कोठडी सुनावण्यात आली आहे.

आझाद मैदानाजवळ असलेल्या मुंबई प्रदेश काँग्रेस कार्यालयाची शुक्रवारी सकाळी तोडफो़ड करण्यात आली. हा हल्ला मनसेच्या कार्यकर्त्यांनीच केला असल्याचे म्हणत मनसेने याची जबाबदारीही स्वीकारली. त्यानंतर 'मनसे कार्यकर्त्यांनी मुंबई काँग्रेसचे कार्यालय फोडले', अशी माहिती देणारे ट्विटही देशपांडे यांनी केले होते.

पोलिसांनी या हल्ल्यानंतर तातडीने सीसीटीव्ही फूटेज तपासून संदीप देशपांडे यांच्यासह आठ कार्यकर्त्यांना अटक केली. या हल्लोखोर कार्यकर्त्यांवर दंगल माजवणे, नुकसान आणि नासधूस करणे असे आरोप ठेवण्यात आले आहेत.