‘उरूस’ महागात पडला; पोलिसांना नोटीस

मुंबई : सर्वोच्च न्यायालयाने ठरवून दिलेल्या ध्वनिप्रदूषण प्रतिबंधक नियमांचे कठोर पालन करण्याचे सुस्पष्ट आदेश मुंबई उच्च न्यायालयाने दिलेले असतानाही गेल्या वर्षी १३ ‌डिसेंबरला मुस्लिमांच्या ‘उरूस’ उत्सवावेळी पोलिस ठाण्याच्या आवारातच आवाजाची मर्यादा ओलांडून लाऊडस्पीकर लावणे माहीम पोलिसांना चांगलेच महागात पडले आहे.

याबद्दल सहाय्यक पोलिस आयुक्त शिलवण ढोवले व माहीम पोलिस ठाण्याचे वरिष्ठ पोलिस निरीक्षक मिलिंद इडेकर यांना न्यायालयाने अवमानाची (कंटेम्प्ट) नोटीस बजावून दोन आठवड्यांत उत्तर मागितले आहे. त्याचबरोबर या अधिकाऱ्यांविरुद्ध काय कारवाई करणार, याविषयी ३ मे रोजी राज्य सरकारकडे उत्तर मागितले आहे.

आवाज फाऊंडेशनच्या सुमैरा अब्दुलअली यांनी न्यायालय अवमान याचिका करून पोलिसांकडून झालेले हे उल्लंघन निदर्शनास आणले आहे. उरूसच्या पहिल्याच दिवशी पोलिस ठाण्याच्या आवारात लावण्यात आलेल्या लाऊडस्पीकरच्या आवाजाची मर्यादेबाहेरची पातळी ध्वनिमापक उपकरणात मोजून पोलिसांच्या निदर्शनास आणली. तरीही त्याची दखल घेण्यात आली नाही. म्हणून नंतर आपण पोलिस आयुक्तांकडे तक्रार दिली होती, असे त्यांनी याचिकेत निदर्शनस आणले. यासंदर्भात न्या. अभय ओक व न्या. ए. के. मेनन यांच्या खंडपीठाने उत्तर मागितले होते. त्याप्रमाणे अतिरिक्त सरकारी वकिलांनी पोलिसांचे प्रतिज्ञापत्र सादर केले आणि आवाजाची मर्यादा ओलांडली नसल्याचा दावा केला. तसेच याचिकादारांचे ध्वनिमापक उपकरण हे अधिकृत नसल्याने त्यात मोजलेली आवाजाची पातळी चुकीची असल्याचाही दावा केला.