ध्वनी प्रदूषण नियम ‘मेट्रो’साठी लागू नाहीत!

म. टा. विशेष प्रतिनिधी, मुंबई

‘मुंबई मेट्रो-३’चे बांधकाम हे मेट्रो कायद्यान्वये सुरू आहे. मेट्रो कायदा हा मेट्रो रेल प्रकल्पांच्या बांधकामासाठी केलेला विशेष कायदा आहे. त्यामुळे मेट्रो प्रकल्पाच्या बांधकामाला ​ ध्वनी प्रदूषण प्रतिबंधक नियमावलीचे नियम लागू होत नाहीत, असा दावा मुंबई मेट्रो रेल महामंडळाने (एमएमआरसीएल) मुंबई उच्च न्यायालयात केला आहे.

कुलाबा-वांद्रे-सीप्झ या मार्गावरील भूमिगत ‘मुंबई मेट्रो-३’ प्रकल्पासंदर्भात कुलाबा येथे रात्रीच्या वेळीही काम होत असल्याने रहिवासी रॉबिन जयसिंघानी यांनी याचिका केली आहे. त्यावरील
प्राथमिक सुनावणीनंतर मुख्य न्यायमूर्ती मंजुला चेल्लुर व न्या. नितीन जामदार यांच्या खंडपीठाने रात्री १० ते सकाळी ६ या वेळेत मेट्रोच्या कामाला मनाई केली होती आणि याविषयी ‘एमएमआरसीएल’ला उत्तर देण्याचे निर्देश दिले होते. त्यानुसार, ‘एमएमआरसीएल’ने नुकत्याच सादर केलेल्या आपल्या प्रतिज्ञापत्रात हा दावा केला आहे.

कुलाबा परिसर दिवसा लोकांच्या गर्दीने गजबजलेला असतो. त्यामुळे काँक्रिट‌किरणाचे काम रात्रीच्या वेळेस करण्याशिवाय पर्याय नाही. शिवाय हे काम करताना कोणालाही त्रास होणार नाही, याची काळजी घेतली जात आहे. कालांतराने आवाजाची पातळी कमी होईल. तसेच याचिकादाराच्या घराच्या परिसरात आवाजाची पातळी मर्यादेतच आहे. त्यामुळे याचिकादाराने वैयक्तिक स्वार्थासाठी ही याचिका केली असल्याचे म्हणणेही ‘एमएमआरसीएल’ने मांडले आहे. मात्र, ‘एमएमआरसीएल’कडून निवासी विभागातील ध्वन‌प्रिदूषण प्रतिबंधक नियम पायदळी तुडवले जात असून त्याविरुद्धच्या तक्रारींकडे पोलिसही दुर्लक्ष करत आहेत, असा आरोप जयसिंघानी यांनी केला आहे. या प्रकरणी पुढची सुनावणी १२ सप्टेंबर रोजी होण्याची शक्यता आहे.