‘लॉकर तोडून जुन्या नोटा बदला’

ramesh.khokrale@timesgroup.com
Tweet : @rameshkMT

संगीत नाटक अकादमीसह अनेक पुरस्कारप्राप्त जुन्या जमान्यातील अभिनेत्री व गायिका सुशीला राणी बाबुराव पटेल यांच्या न्यायालयीन वादात अडकलेल्या संपत्तीत जुन्या एक हजार व पाचशेच्या नोटांमध्ये मोठी रक्कम असण्याची दाट शक्यता असल्याने मुंबई उच्च न्यायालयाने शुक्रवारी त्याविषयी एक अत्यंत महत्त्वाचा आदेश दिला. त्यानुसार, कोर्ट रिसिव्हरने त्यांच्या दोन बँकांमधील चार लॉकरमध्ये किती नोटा आहेत, याची नंबरसह नोंद करून घ्यावी आणि बँकेत नवे इस्टेट अकाऊंट उघडून त्यामध्ये रोकड जमा करावी, असे आदेश न्या. गौतम पटेल यांनी दिले आहेत.

उच्च न्यायालयाच्या या महत्त्वाच्या आदेशामुळे विविध न्यायालयांत संपत्तीच्या वादावरून अडकलेल्या अनेक प्रकरणांत बँकांमधील जुन्या नोटांची रोकड बदलण्याचा मार्ग उपलब्ध होण्याची शक्यता निर्माण झाली आहे.

सुशीला राणी यांचा बांद्रा पश्चिम येथील पाली हिल येथे सुप्रसिद्ध गिरनार बंगला आहे. त्यांनी कलाक्षेत्रातील विविध कामांच्या उद्देशाने सुशीला राणी बाबुराव पटेल ट्रस्ट हा ट्रस्टही स्थापन केला होता. नीला शिंदे या ट्रस्टच्या अध्यक्ष आहेत. सुशीला यांचे २४ जुलै २०१० रोजी निधन झाले. त्यापूर्वी त्यांनी इच्छापत्र केले होते आणि कुटुंबीयांशी पटत नसल्याने त्यांनी आपला बंगला व अन्य मालमत्ता ट्रस्टला दान केली होती, असा ट्रस्टींचा दावा आहे. तसेच सुशील यांच्या निधनानंतर कुटुंबीयांनी बंगला जबरदस्तीने बळकावला, असाही ट्रस्टचा आरोप होता. नंतर याप्रश्नी ट्रस्टच्या वतीने शिंदे यांनी फेब्रुवारी २०१५मध्ये उच्च न्यायालयात दावा दाखल केला, तर बाबुराव पटेल यांच्या नात गीता पटेल यांनी नंतर अर्जाद्वारे त्याला हरकत घेतली. याविषयीचा वाद न्या. पटेल यांच्यासमोर सुनावणीसाठी प्रलंबित आहे.

यादरम्यान, केंद्र सरकारने चलनबदलाचा निर्णय घेतल्याने सुशीला राणी यांच्या पाली ‌हिल येथील विजया बँकेतील तीन लॉकर आणि युनियन बँकेतील लॉकर यातील रोकडचा मुद्दा शिंदे यांनी अॅड. कुमार कुकरेजा यांच्यामार्फत न्यायालयासमोर आणला. याविषयीच्या सुनावणीदरम्यान कुकरेजा यांनी ‘लॉकरमध्ये किती रोकड असेल माहीत नाही, परंतु प्रकरणाचा निकाल लागेपर्यंत कदाचित मुदत निघून जाईल आणि ती रोकड रद्दी होईल’, असे म्हणणे मांडले. न्यायालयानेही त्याची तात्काळ दखल घेतली. त्यानुसार, कोर्ट रिसिव्हरने चावी नसलेले हे लॉकर तोडावेत. त्यातील रोकडची नोंद करून नव्या इस्टेट अकाऊंटमध्ये ती जमा करावी. तसेच दागिने नव्या लॉकरमध्ये जमा करावेत, असे आदेश न्या. पटेल यांनी दिले.