मुंबईसाठी कायपण! महापौर नर्सच्या वेषात थेट पोहोचल्या 'नायर'मध्ये

मुंबई: करोनाचा प्रादुर्भाव झाल्यानंतर मुंबईच्या प्रमुख म्हणून महापौर किशोरी पेडणेकर यांनी आधी मुंबईतील सर्व रुग्णालयांना भेटी दिल्या... तिथल्या व्यवस्थेची पाहणी केली... पालिकेत अधिकाऱ्यांच्या बैठकांवर बैठका घेऊन करोनाचा प्रादुर्भाव वाढणार नाही, पालिकेच्या सर्व यंत्रणा कशा सुसज्ज राहतील याच्या सूचना दिल्या... त्यानंतर त्यांनी स्वत:ला होम क्वॉरंटाइन करून घेतलं... पण त्यांच्यातील परिचारिका त्यांना स्वस्थ बसू देत नव्हती... अखेर त्यांनी आज परिचारिकेचा वेष परिधान केला आणि थेट नायर रुग्णालय गाठलं. मलाही तुमच्यासोबत नर्स म्हणून काम करायचंय, अशी इच्छाही त्यांनी व्यक्त केली... एवढेच नव्हे तर नायरच्या नर्सेससमोर भाषण देऊन त्यांनी सर्व नर्सेसच हुरुपही वाढवला.

महापौर किशोरी पेडणेकर यांनी आज थेट परिचारिकेचा वेष परिधान करून नायर रुग्णालय गाठलं ते काम करण्यासाठीच. करोनाच्या रुग्णांवर उपचार करण्यासाठी आपल्याकडूनही डॉक्टरांना मदत व्हावी म्हणून त्या नायरमध्ये आल्या. नाईट शिफ्टमध्ये नर्स म्हणून काम करण्याची इच्छाही त्यांनी बोलून दाखवली. त्यानंतर नायरमधील सर्व नर्सेसचा हुरूप वाढवणारं भाषणही त्यांनी केलं. यावेळी त्यांनी नर्स म्हणून त्यांना आलेले अनुभव आणि संकट काळात परिस्थिती हाताळताना घ्यायवयाची काळजी याबाबतचं मार्गदर्शन केलं. तत्पूर्वी त्यांनी एक ट्विट केलं होतं. 'मुंबईसाठी कायपण...मी घरी थांबून काम करू शकत नाही. मी तुमच्यासाठी फिल्डवर येत आहे. तुम्ही काळजी घ्या,' असं पेडणेकर यांनी या ट्विटमध्ये म्हटलं होतं.

करोनाः पुण्यात रुग्ण दुप्पट होण्याचा वेग देशात सर्वाधिक

सस्पेन्स कायम; लॉकडाउनवर निर्णय ३ मे नंतरच

अत्यंत कमी वयात आपल्या मुलींना करोनाचा संसर्ग होऊ शकतो, अशा तक्रारी नर्सिंग शिकणाऱ्या मुलींच्या पालकांकडून ऐकायला येत होत्या. त्यामुळे त्यांना हुरूप यावा म्हणून मी नायरमध्ये गेले. या संकटाच्या काळात आपल्यालाही रुग्णांची सेवा करायची संधी आहे, असं सुद्धा मनाला वाटलं म्हणूनच मी नायरमध्ये काम करण्याची इच्छाही व्यक्त केली, असं पेडणेकर म्हणाल्या. नायरमध्ये काम करणाऱ्या दुसऱ्या आणि तिसऱ्या वर्षातील प्रत्येकी पाच नर्सेसची नावं महापौर पुरस्कारासाठी सूचवण्याच्या सूचनाही त्यांनी नायरच्या अधिष्ठात्यांना दिल्या. तसेच नर्सेसला ५०० रुपये विशेष भत्ता दिल्याचंही त्यांनी सांगितलं. दरम्यान, किशोर पेडणेकर यांनी उरणच्या जवाहरलाल नेहरू पोर्ट ट्रस्ट रुग्णालयात १९९३ ते २००२ पर्यंत नर्स म्हणून काम केलं आहे.


महापौर नर्स म्हणून रुजू; आदित्यंनी केलं अभिनंदन

दरम्यान, महापौरांच्या या कृतीची पर्यावरण मंत्री आदित्य ठाकरे यांनी दखल घेऊन त्यांचं अभिनंदन केलं आहे. मुंबईच्या महापौर किशोरीताई पेडणेकर नर्स म्हणून रुजू झाल्या आहेत. करोनाविरुद्ध लढणार आणि जिंकणारचं, असं आदित्य ठाकरे यांनी ट्विटमध्ये म्हटलं आहे.


पालिकेचा दणका; ७५ टक्के नर्सिंग होम्स सुरू