करोना लसीचे ४० लाख डोस वाया जाण्याची शक्यता!; आता नवा 'फॉर्म्युला' वापरात

म. टा. विशेष प्रतिनिधी, मुंबई ः लसमात्रांचा अपव्यय टाळण्यासाठी राज्यातील लसीकरण केंद्रांवर २० लाभार्थ्यांना एकत्र केल्यानंतर लसीकरण करण्याचा 'फॉर्म्युला' वापरात येत आहे. लसमात्रा वाया जाण्याचे प्रमाण कमी होण्यासाठी हे सूत्र वापरण्यात येत आहे. येत्या ऑगस्टमध्ये कोव्हिशील्डच्या अंदाजे २५ लाख मात्रा तर, नोव्हेंबरमध्ये कर्बोव्हॅक्सच्या १५ लाख मात्रा मुदतबाह्य होणार आहेत. त्यांचा अपव्यय टाळण्यासाठी अधिकाधिक लाभार्थ्यांमध्ये लसीकरण करण्यात येत आहे.

करोना संसर्गाचा फैलाव सुरू झाल्यानंतर लसीकरणासाठी येणाऱ्या लाभार्थ्यांची संख्या वाढली आहे. पस्तीस ते चाळीस हजार लसीकरणावरून आता प्रतिदिन एक लाखांपर्यत लसीकरण केले जात आहे. त्यामुळे या मात्रा वापरात येतील, त्या वाया जाणार नाही. लशीची उपलब्धता पुरेशी असल्याचे राज्याच्या लसीकरण कार्यक्रमाचे प्रमुख डॉ. सचिन देसाई यांनी सांगितले. आरोग्य विभागातील वरिष्ठ वैद्यकीय अधिकाऱ्यांनी दिलेल्या माहितीनुसार 'हर घर दस्तक' या मोहिमेंतर्गत लसीकरणाचे उद्दिष्ट्य पूर्ण करण्याचा प्रयत्न केला जात असला तरीही या मोहिमेला मिळणारा प्रतिसाद अद्याप वाढलेला नाही. लसीकरणासंदर्भात गैरसमज असलेल्या वा लस घेतल्यानंतर करोना झालेल्या व्यक्तींचे मन वळवण्यामध्ये अधिक प्रयत्न करावे लागतात. शाळा सुरू झाल्यानंतर बारा वर्षांपुढील लाभार्थ्यांमध्ये लसीकरणाचे प्रमाण वाढेल. मात्र हा संसर्ग केवळ ठाणे, पुणे, मुंबई याच जिल्ह्यांमध्ये वाढल्यानंतर पुन्हा कमी झाल्यास लसीकरणाचा वेग असाच राहील का याबद्दल त्यांनी शंका उपस्थित केली.

कर्बोव्हॅक्सच्या मात्रा वाया

आत्तापर्यंत सर्व लशींमध्ये भारतात कर्बोव्हॅक्सच्या मात्रा वाया जाण्याचे प्रमाण सर्वाधिक असून राज्यात दहा टक्क्यांपेक्षा अधिक तर कोव्हॅक्सिन २.७९ टक्के व कोव्हिशील्डच्या मात्रा ०.०९ टक्के मात्रा वाया गेल्या आहेत. कर्बोव्हॅक्सची एक वायल ही २० मात्रांची असून, १२ ते १४ या वयोगटामध्ये लस घेणाऱ्या लाभार्थ्यांची संख्या त्या तुलनेमध्ये कमी आहे. मागील काही महिन्यांपासून कोव्हॅक्सिनला मिळणारा प्रतिसादही वाढता नसल्याने लस वाया जाण्याचे प्रमाण अधिक आहे. उत्पादकांनी पाच किंवा दहा वायल्सची उपलब्धता केल्यास मात्रा वाया जाण्याचे प्रमाण कमी होऊ शकेल, याकडे वैद्यकीय तज्ज्ञांनी लक्ष वेधले आहे.

सीएसआरचा पर्याय

ज्या खासगी रुग्णालयांनी लसीकरणासाठी विशेष केंद्रांची सुरुवात केली होती, तिथेही प्रतिसाद कमी असल्यामुळे मात्रा वाया जाण्यापूर्वी त्यांनी पालिका तसेच सार्वजनिक रुग्णालयांमध्ये त्या स्वीकारण्यासंदर्भात विचारणा केली होती. सीएसआरच्या पर्यायामध्ये आरोग्य शिबिरे तसेच या रुग्णालयांमध्ये मात्रा उपलब्ध करून देण्यात आल्या. लसीकरणाचा वेग वाढावा यासाठी विविध पातळ्यांवर प्रयत्न होत असले तरीही खासगी रुग्णालयांनी मात्र यावेळी त्यासाठी पुढाकार घेतलेला नाही.

चिंतेत भर!, ४० वर्षांखालील दोघांचा मृत्यू; मुंबईसह राज्यात करोना रुग्णसंख्या वाढतीच

मुंबईत १८०३ नवे रुग्ण

मुंबई : राज्यात करोना रुग्णांची संख्या दररोज वाढत असून, रविवारी २९४६ नव्या रुग्णांचे निदान झाले. राज्यात रविवारी करोनाच्या दोन रुग्णांचे निधन झाले. राज्यात रविवारी १४३२ रुग्ण बरे होऊन घरी गेले आहेत. सध्या राज्यात १६,३७० करोनाचे उपचाराधीन रुग्ण आहेत. मुंबईत रविवारी करोनाच्या १८०३ नव्या रुग्णांचे निदान झाले असून, लोकांनी गर्दीच्या ठीकाणी जाणे टाळावे तसेच मुखपट्टीचा वापर करावा, असे आरोग्य विभागातील वरिष्ठ अधिकाऱ्यांचे म्हणणे आहे.