अ‍ॅपशहर

मात्रांसाठी धावाधाव! राज्यात कोव्हिशिल्ड, कर्बोव्हॅक्स अनुपलब्ध, निम्मी लसीकरण केंद्रे बंद

राज्यात कोव्हिशिल्ड मात्रा अजिबात उपलब्ध नाही. यासाठी केंद्र सरकारकडे मागणी करण्यात आली असून अद्याप प्रतिसाद मिळाला नसल्याचे राज्याच्या लसीकरण कार्यक्रमातील वरिष्ठ वैद्यकीय अधिकाऱ्यांनी सांगितले.

Authored byशर्मिला कलगुटकर | महाराष्ट्र टाइम्स 24 Dec 2022, 8:41 am
मुंबई : चीनसह अन्य काही देशांमध्ये करोनाचा संसर्ग पुन्हा वाढीस लागल्यामुळे देशभरात पुन्हा लसीकरणावर चर्चा होऊ लागली आहे. प्रादुर्भावाच्या वाढत्या धास्तीने राज्यासह मुंबईमध्ये ‘अॅलर्ट’ जारी करण्यात आला आहे. मात्र शहरामध्ये या संसर्गाला प्रतिबंध करणाऱ्या लशीच्या मात्रांची उपलब्धता नसल्याचे वास्तव आहे. कोव्हॅक्सिन वगळता कोव्हिशिल्ड आणि कर्बोव्हॅक्सच्या मात्रा संपल्या असून, राज्याने मागणी करूनही त्या केंद्र सरकारकडून अद्याप उपलब्ध झालेल्या नाहीत. अशातच दुसऱ्या आणि बूस्टर मात्रासाठीचा नागरिकांचा प्रतिसाद थंडावल्यामुळे निम्म्याहून अधिक लसीकरण केंद्रे बंद करण्यात आली आहेत.
महाराष्ट्र टाइम्स.कॉम injection
मात्रांसाठी धावाधाव! राज्यात कोव्हिशिल्ड, कर्बोव्हॅक्स अनुपलब्ध, निम्मी लसीकरण केंद्रे बंद


करोनासंसर्ग कमी झाल्यानंतर नागरिकांचे लसीकरणाकडे काहीसे दुर्लक्ष होऊन प्रतिसाद घटला होता. परिणामी मुंबईत सध्या सुरू असलेल्या २३ केंद्रांमध्ये आठवड्यातून एकच वेळ लसीकरण केले जाते. या मात्रा ठरावीक कालावधीनंतर मुदतबाह्य होतात. त्यामुळे त्या जास्त दिवस केंद्रावर ठेवता येत नाहीत. आता नव्या व्हेरिएंटचा उद्रेक झाल्याच्या पार्श्वभूमीवर पुन्हा लसीकरणाचा विचार होऊ लागला आहे. मात्र राज्यात कोव्हिशिल्ड तसेच कर्बोव्हॅक्सच्या मात्रा उपलब्ध नसून, त्या मिळवण्यासाठी पाठपुरावा सुरू असल्याचे सांगण्यात आले.

राज्यभरातही लसीकरणाचा वेग अतिशय मंदावला असून, ग्रामीण भागामध्ये लसीकरणासाठी पुढे येणाऱ्यांची संख्या खूपच घटली आहे. सध्या केवळ एक हजार २०० लसीकरण केंद्रे सुरू असून, निम्मी बंद झाली आहेत. प्रतिसादाअभावी आठवड्यातील मोजकेच दिवस येथे लसीकरण केले जाते. राज्यात कोव्हिशिल्ड मात्रा अजिबात उपलब्ध नाही. यासाठी केंद्र सरकारकडे मागणी करण्यात आली असून अद्याप प्रतिसाद मिळाला नसल्याचे राज्याच्या लसीकरण कार्यक्रमातील वरिष्ठ वैद्यकीय अधिकाऱ्यांनी सांगितले.

खासगी रुग्णालयांमध्येही परिस्थिती वेगळी नाही. सरकारने लसीकरण मोफत केल्यानंतर खासगी रुग्णालयांचा लसीकरणासाठी असलेला उत्साह कमी झाला. लसमात्रा व लसीकरणासाठी आकारण्यात येणारे शुल्क, जागेची उपलब्धता, मनुष्यबळाची गुंतवणूक यामध्ये 'नफ्याचे' गणित जुळत नसल्यामुळे खासगी रुग्णालयांनी लसीकरण बंद केले आहे.

दरम्यान, पहिली मात्रा न घेतलेल्यांची संख्याही राज्यात जास्त आहे. त्यांच्याकडून विचारणा केली जाते, मात्र, प्रत्यक्षात येणाऱ्या लाभार्थ्यांची संख्या अत्यल्प आहे, अशी माहिती 'असोसिएशन ऑफ मेडिकल कन्सल्टंट'चे माजी अध्यक्ष डॉ. दीपक बैद यांनी दिली.

अशी आहे लसीकरणस्थिती

राज्यात आजपर्यंत एकूण १७ कोटी ७६ लाख २० हजार ९५२ लाभार्थ्यांचे करोना लसीकरण करण्यात आले आहे. यामध्ये पहिली मात्रा घेतलेल्यांची संख्या नऊ कोटी १६ लाख ४० हजार ४८७ असून, दुसरी मात्रा घेतलेल्यांची संख्या सात कोटी ६५ लाख ४९ हजार १२४ आहे. याशिवाय नऊ कोटी ४३ लाख १३ हजार ४१ जणांनी बूस्टर मात्रा घेतली आहे. १८ ते ५९ या वयोगटात राज्यात ४९ लाख ८६ हजार ७०३ जणांचे लसीकरण झाले आहे.

करोनासंसर्ग होऊ नये यासाठी बूस्टर मात्रा घेतलेल्यांचे प्रमाण अवघे १७ टक्के आहे. ज्यांचे लसीकरण राहिले आहे, त्यांनी ते करून घेण्याचे आवाहन पालिका प्रशासनाने केले आहे. दुसरी आणि बूस्टर मात्रा न घेतलेल्या लाभार्थ्यांनी प्रतिसाद दिल्यास लसीकरण केंद्रांची संख्या वाढवण्यात येईल.- डॉ. मंगला गोमारे, कार्यकारी आरोग्य अधिकारी, आरोग्य विभाग
लेखकाबद्दल
शर्मिला कलगुटकर
शर्मिला कलगुटकर या महाराष्ट्र टाइम्स च्या मुंबई आवृत्तीमध्ये विशेष प्रतिनिधी म्हणून कार्यरत आहे. त्यांना पत्रकारितेमध्ये २१ वर्षाचा अनुभव आहे. त्या आरोग्य, सामाजिक, जेंडर अशा विविध विषयांवर त्यांनी सातत्यापूर्ण लिखाण आणि वार्तांकन करतात. आरोग्यक्षेत्रातील अनेक गैरप्रकारांना त्यांनी शोधपत्रकारितेच्या माध्यमातून वाचा फोडली आहे. या कार्याची दखल घेत त्यांना पत्रकारितेतील विविध पुरस्कारांनी सन्मानित करण्यात आले आहे.... आणखी वाचा

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज