‘सृजनशील व्यक्तींनी दिग्दर्शनाकडे वळावे’

पार्ले महोत्सवात अंबर हडप यांचे आवाहन


म. टा. प्रतिनिधी, मुंबई

‘जेथे न पोहचे रवी तेथे पोहचे कवी’ ही म्हण थोडी वाढवून ‘...आणि ते दिग्दर्शक दाखवी’, असे म्हणता येईल, असे प्रतिपादन ‘बालक पालक’, ‘यलो’ व ‘बंध नायलॉनचे’ या चित्रपटांचे लेखक अंबर हडप यांनी केले. तसेच अधिकाधिक सृजनशील व्यक्तींनी दिग्दर्शनाकडे वळावे, असे आवाहनही त्यांनी केले. अठराव्या पार्ले महोत्सवातील लघुपट स्पर्धेतील परीक्षक या नात्याने ते आपले मनोगत मांडत होते.

स्मार्टफोनच्या सध्याच्या जमान्यात लघुपट बनवणे खर्चिक राहिले नाही. व्हॉट्सअॅप व यूट्युबमुळे आपली कलाकृती असंख्य लोकांपर्यंत पोहोचवणे सोपे झाले आहे, असे मत यावेळी हडप यांनी व्यक्त केले. तर ‘विटी-दांडू’चे दिग्दर्शक गणेश कदम यांनी स्पर्धेत सादर झालेल्या लघुपटांचा आढावा घेत पारितोषिकेही जाहीर केली.

या महोत्सवातील आठव्या दिवशीही गुणवंत स्पर्धकांवर पारितोषिकांचा वर्षाव झाला. कलाविभागातील चित्रकला, हस्ताक्षर, रांगोळी व लघुपटाच्या माध्यमातून स्पर्धकांनी आपल्या सृजनशीलतेचे दर्शन घडवले. सफाई कर्मचाऱ्याच्या जीवनावर आधारित रांगोळीसाठी नीलेश तोरसकर यांना प्रथम, धूम्रपानाच्या दुष्परिणामांवर प्रकाशझोत टाकणाऱ्या रांगोळीसाठी दशरथ वारणकर यांना द्वितीय, तर डायनॉसोरविषयक रांगोळीसाठी नागेश सागवे यांना तृतीय पारितोषिक मिळाले. पैशांच्या बाजारात हरवत जाणारा विश्वास दर्शविणाऱ्या ‘मनी ऑर्डर’ या लघुपटासाठी जयंत जठार यांना प्रथम, वीजबचतीचा संदेश देणाऱ्या ‘इव्हन डेविल कान्ट’ या लघुपटाला द्वितीय, तर स्त्रियांवरील लैंगिक अत्याचाराबाबत पुरुषांचे डोळे उघडणाऱ्या ‘इट बिगिन्स विथ मी’ या लघुपटाला तृतीय बक्षीस देण्यात आले. हस्ताक्षर स्पर्धेत ८२ वर्षीय समिधा सोनार यांनी बक्षीस पटकावले.

रोहित शेट्टी ‘पार्ले महोत्सव श्री’

अत्यंत अटीतटीच्या ‘पार्ले महोत्सव श्री’ या शरीरसौष्ठव स्पर्धेत रोहित शेट्टी (आर.के.एम.) याने बाजी मारली. ‘पार्ले महोत्सव’चे प्रमुख आयोजक आमदार पराग अळवणी यांच्या हस्ते त्याला किताब प्रदान करण्यात आला. नितीन म्हात्रे याला उपविजेता म्हणून पुरस्कृत करण्यात आले. या स्पर्धेत १५०हून अधिक स्पर्धकांनी भाग घेतला होता.