राम मंदिर स्टेशनवर सेना-भाजपचं 'रामायण'!

मटा ऑनलाइन वृत्त । मुंबई

पश्चिम रेल्वेमार्गावर जोगेश्वरी आणि गोरेगाव स्थानकांदरम्यान उभारण्यात आलेल्या नव्या 'राम मंदिर' रेल्वेस्थानकाच्या उद्घाटन सोहळ्यात आज भाजप आणि शिवसेना कार्यकर्त्यांमध्ये श्रेयवादाचं 'रामायण' पाहायला मिळालं. भाजप कार्यकर्त्यांकडून पंतप्रधान नरेंद्र मोदी यांच्या नावाचा जयघोष सुरू होता तर शिवसैनिकांकडून दिवंगत बाळासाहेब ठाकरे यांच्या नावाचा जयजयकार केला जात होता. या घोषणाबाजीमुळे 'मोदी रामापेक्षा मोठे नाहीत', असे सुनावत शिवसेना नेते दिवाकर रावते यांनी आपलं भाषण थांबवण्याचा निर्णय घेतला. दरम्यान, या गोंधळातच स्थानकाचं उद्घाटन रेल्वे मंत्री सुरेश प्रभू यांच्या हस्ते उरकण्यात आले.

मुंबई महापालिका निवडणूक जवळ येत असल्याने शिवसेना आणि भाजपमध्ये वर्चस्वाची लढाई सुरू झाली आहे. त्याचा प्रत्यय आज मुंबईतील राम मंदिर रेल्वेस्थानकाच्या उद्घाटन सोहळ्यातही आला. या कार्यक्रमाला सुरेश प्रभू यांच्यासह राज्याचे परिवहन मंत्री दिवाकर रावते, शिवसेना खासदार गजानन कीर्तिकर, मंत्री रवींद्र वायकर व्यासपीठावर उपस्थित होते. कार्यक्रम सुरू होताच कार्यक्रमाला आलेल्या शिवसेना, भाजप तसेच विश्व हिंदू परिषद कार्यकर्त्यांनी आपापले झेंडे फडकावत घोषणाबाजी सुरू केली. त्यामुळे एकच गोंधळ उडाला.

सुरेश प्रभू यांनी कार्यकर्त्यांना शांत राहण्याचं आवाहन केलं मात्र कुणीच ऐकण्याच्या मनस्थितीत नव्हतं. त्यातच कीर्तिकर यांनी या स्थानकाला राम मंदिर हे नाव मिळावं म्हणून शिवसेनेने लोकसभेत हा मुद्दा मांडल्याची आठवण करून दिली. त्यानंतर गोंधळात अधिकच भर पडली. भाजप कार्यकर्त्यांनी घोषणांचा जोर वाढवला. या घोषणाबाजीतच दिवाकर रावते यांचं भाषण सुरू झालं. आपण सगळेच रामभक्त आहोत, असे आपल्या भाषणाच्या सुरुवातीलाच नमूद करत रावते यांनीही कार्यकर्त्यांना शांत होण्याचं आवाहन केलं मात्र भाजप कार्यकर्ते काही थांबत नव्हते. त्यांनी मोदींच्या जयजयकाराच्या घोषणा अखंड सुरूच ठेवल्या. त्यावर संतप्त होत मोदी रामापेक्षा मोठे नाहीत, असे सुनावत रावते यांनी भाषण थांबवले व माइक सोडण्याचा निर्णय घेतला.