म. टा. खास प्रतिनिधी, मुंबई
पालिका आणि पोलिसांची परवानगी नसताना खासगी सोसायटीच्या मालकीच्या जागेवर मंडप उभारून गणेशोत्सव साजरा करणाऱ्या सहयोग मित्र मंडळावर कांजुरमार्ग पोलिस ठाण्यात गुन्हा दाखल करण्यात आला आहे. पोलिसांनी याप्रकरणी मंडळाच्या २५ पदाधिकाऱ्यांवर अटकेची कारवाई केली.
भांडुप पूर्वेकडील अशोकनगरमध्ये मित्रधाम गृहनिर्माण सोसायटी असून, या सोसायटीला लागूनच एक छोटा मोकळा भूखंड आहे. काही वर्षांपूर्वी हा त्रिकोणी आकाराचा भूखंड मित्रधाम सोसायटीने मालकाकडून खरेदी केला. याच भूखंडावर येथील सहयोग मित्र मंडळाच्या वतीने गणेशोत्सव साजरा केला जातो. मात्र मालकी हक्क मित्रधाम सोसायटीकडे गेल्यानंतर त्यांचे ना हरकत प्रमाणपत्र घेऊन पालिका आणि पोलिसांकडून परवानगी घेतली जात होती. मात्र यावर्षी सोसायटीने प्रमाणपत्र देण्यास नकार दिला. त्यामुळे पालिकेने दिलेली परवानगी रद्द केली आणि पोलिसांनीदेखील परवानगी नाकारली. असे असतानाही मंडळाने मंडप बांधून गणेशमूर्ती आणून उत्सव साजरा केला. याप्रकरणी सोसायटीच्या वतीने तक्रार करण्यात आल्यानंतर पोलिसांनी गुन्हा दाखल करून मंडळाच्या २५ जणांना अटक केली.