म. टा. विशेष प्रतिनिधी, मुंबई
करोना रूग्णांची सोय, उपलब्ध खाटा, करोनाचा वाढता प्रादूर्भाव, प्रशासनाकडील गांभीर्याचा अभाव या प्रमुख मुद्यांवर शुक्रवारी मुंबई महापालिका गटनेत्यांच्या बैठकीत भाजप, राष्ट्रवादी व काँग्रेसने प्रशासनाला लक्ष केले.
खाजगी रूग्णालयात करोना रूग्णांसाठी १० टक्के खाटा राखीव ठेवण्याचा निर्णय झाला असेल तर कोणत्या रूग्णालयात ही व्यवस्था आहे, त्याची यादी ऑनलाइन करावी, अशी मागणी भाजपचे गटनेते व विरोधी पक्षनेते प्रभाकर शिंदे यांनी केली. त्याचबरोबर एप्रिल ते सप्टेंबर २०२० पर्यंत निवासी मालमत्ता कर स्थगित करावी, अशीही मागणी करण्यात आली. समाजवादी पक्षाचे गटनेते रईस शेख यांनीही हा मुद्दा उपस्थित केला होता. काँग्रेसचे गटनेते रवीराजा यांनी करोना पॉझिटिव्ह किंवा संशयित रूग्णांना रूग्णालयात खाटा मिळत नसल्याची तक्रार केली.