म. टा. प्रतिनिधी, मुंबई
अकरावी प्रवेश प्रक्रियेचे वेळापत्रक उद्या, सोमवारी जाहीर होण्याची शक्यता असून, दरवर्षी माहिती पुस्तकाद्वारे दिली जाणारी कॉलेजांची कट ऑफ यादी यंदा ऑनलाइन प्रसिद्ध होणार आहे. ही यादीही सोमवारीच जाहीर होण्याची शक्यता आहे.
यंदाही मुंबई विद्यापीठ संलग्नित कॉलेजांसाठी अकरावी प्रवेशासाठी ऑनलाइन प्रवेश प्रक्रिया राबविण्यात आली आहे. दरवर्षी दहावीचा निकाल जाहीर झाल्यानंतर लगेचच ही प्रक्रिया आणि त्याचे वेळापत्रक जाहीर होते. या प्रक्रियेचा पहिला टप्पा सुरू झाला असला, तरी दुसरा टप्पा अद्याप जाहीर झालेला नाही. त्यामुळे अद्याप कॉलेज प्रवेश प्रक्रियेबाबत विद्यार्थी तसेच शाळांमध्येही संभ्रम आहे. शनिवारी अनेक शाळांमध्ये या प्रक्रियेबाबत काही माहिती मिळेल, या आशेने विद्यार्थी आले होते. मात्र याबाबत कोणतीही माहिती न मिळाल्याने सर्वांनीच परतीचा मार्ग धरला. प्रवेश प्रक्रियेबाबत अद्याप शाळांकडेही शिक्षण विभागाकडून कोणताही संदेश पोहोचलेला नाही. सोमवारी कट ऑफ यादी ऑनलाइन जाहीर होणार असल्याने येत्या आठवड्यातच अकरावी प्रवेश प्रक्रिया सुरू होणार आहे.