घरे कोसळून तिघे मृत्युमुखी

मानखुर्दमध्ये सिलिंडर स्फोट, ११ जण जखमी

म. टा. प्रतिनिधी, मुंबई

महाराष्ट्रनगरमधील साईबाबाचाळीत सकाळी सहाच्या सुमारास मृत संजय यांची पत्नी रेखा यांनी चहा करण्यासाठी गॅस चालू केला असता, गॅसगळतीमुळे सिलिंडरचा स्फोट झाला. यात वानखडे कुटुंबीय गंभीररीत्या भाजले, तर स्फोटाच्या तडाख्याने एक तळमजला, पहिला मजला बाजूच्या घरावर कोसळला. या ढिगाऱ्याखाली ११ जण अडकले होते. या घटनेची माहिती स्थानिकांनी पोलिस आणि अग्निशमन दलाला दिल्यानंतर तीन फायर इंजिन, एक रुग्णावाहिका, एक रेस्क्यू व्हॅन तातडीने घटनास्थळी दाखल झाली. मात्र चिंचोळ्या गल्लीत ढिगाऱ्याखाली अडकलेल्यांना बाहेर काढताना अग्निशमन दलाच्या जवानांना तारेवरची कसरत करावी लागली. या दुर्घटनेत जखमी झालेल्या कस्तुरबाबाई, रेखा यांना गोवंडीच्या शताब्दी रुग्णालयात दाखल करण्यात आले, मात्र उपचारादरम्यान त्यांचा मृत्यू झाला. तसेच संजय यांनी सायन रुग्णालयात अखेरचा श्वास घेतला. ढिगाऱ्याखालून विशाखा वानखडे, प्रशिका वानखडे, उमेश गावडे, शोभा गावडे, ओंमकर गावडे, सोहम गावडे, स्वाती पवार, स्वस्तिक जाधव आणि अन्य तिघांना अग्निशमन दलाच्या जवानांनी बाहेर काढले असून, त्यांच्यावर शताब्दी रुग्णालयात उपचार सुरू आहेत.

बाजूच्या घरांना तडा

महाराष्ट्रनगर हे खाडीवर वसलेले असून, येथील घरांचे बांधकाम तुलनेने कमकुवत आहे. परिणामी या सिलिंडरस्फोटामुळे आजुबाजूच्या घरांना तडे गेले आहेत. परिमंडळ सहाचे उपायुक्त शहाजी उमाप यांनी घटनास्थळी भेट देऊन परिस्थितीचा आढावा घेतला.