​ दादर ‘आयटीआय’ची दयनीय अवस्था

जीव मुठीत घेऊन विद्यार्थी घेतात शिक्षणाचे धडे

म. टा. प्रतिनिधी, मुंबई

राज्यभरातील आयटीआय संस्थांमधील प्रवेशासाठी विद्यार्थ्यांचा ओढा वाढत असताना दुसरीकडे दादर येथील आयटीआय संस्थेत मुलांना अक्षरशः जीव मुठीत घेऊन शिक्षण घ्यावे लागत असल्याचे समोर आले आहे. या इमारतीची दुरवस्था झाली असून येथील स्वच्छतागृहे गेल्या अनेक दिवसांपासून बंद आहेत. सार्वजनिक बांधकाम विभागाने ही इमारत रिकामी करण्याची सूचना दिली आहे. विशेष म्हणजे, नवी इमारत बांधून तयार असूनही विद्यार्थी जुन्याच इमारतीत शिक्षण घेत आहेत.

दादर येथील कीर्ती कॉलेजजवळ आयटीआयच्या दोन इमारती आहेत. यातील एक इमारत मुलींच्या आयटीआयसाठी असून दुसऱ्या इमारतीची पडझड झाली आहे. पार्टिशन तुटलेले आहे. पिण्याच्या पाण्यासाठी विद्यार्थ्यांना वणवण करावी लागते. स्वच्छतागृह बंद असल्याने विद्यार्थ्यांना पोतुर्गीज चर्चजवळील सार्वजनिक शौचालयाचा वापर करावा लागत आहे. या अवस्थेमुळे येथील अनेक अभ्यासक्रम बंद करण्यात आले आहेत. गेल्या तीन वर्षांपासून नवी इमारत बांधून तयार असतानाही वीजपुरवठा नसल्याने ती इमारत न वापरता पडून आहे.

दरम्यान, शिवसेनेच्या उपमहापौर शुभांगी वरळीकर आणि मुंबई विद्यापीठाचे माजी सिनेट सदस्य प्रदीप सावंत यांनी याठिकाणी भेट दिली असता वरील प्रकार उघडकीस आला. यासंदर्भात उच्च व तंत्रशिक्षण राज्यमंत्री रविंद्र वायकर यांची लवकरच भेट घेणार असून त्यांच्यासमोर हा प्रश्न मांडणार असल्याचे माजी सिनेट सदस्य प्रदीप सावंत यांनी ‘मटा’शी बोलताना सांगितले.