राज्यात थरथराट; नऊ थराची दहीहंडी फोडली

मटा ऑनलाइन वृत्त । मुंबई

गल्लीबोळातून घुमलेली 'आला रे आला'ची ललकारी...पावसाच्या अधूनमधून बरसणाऱ्या सरी...डिजेचा धतडततड धतडततड दणदणाट... आणि एकावर एक उंच मानवी मनोरे रचण्याची सुरू असलेली स्पर्धा...अशा जल्लोषपूर्ण वातावरणात आज दहीहंडीचा उत्सव मुंबई-ठाण्यासह संपूर्ण राज्यात दणक्यात साजरा करण्यात आला. तर बोरिवलीच्या शिवसाई मंडळाने नऊ थर लावून ठाण्याच्या नौपाड्यातील दहीहंडी फोडून ११ लाखाचे बक्षीस पटकावले. या उत्सवाला कोणतेही गालबोट लागले नसले तरी एक-दोन ठिकाणी मनोरे कोसळून झालेल्या दुर्घटनेमुळे पाच गोविंदा जखमी झाले आहेत.

यंदा स्वातंत्र्य दिन आणि दहीहंडी उत्सव एकाच दिवशी आल्याने चाकरमानी मुंबईकरांना थरांचे स्वातंत्र्य अनुभवायला मिळाला. दहीहंडीवरील बंदी उठवल्यानंतर आज सर्वत्र गोविंदांचा उत्साह दिसून येत होता. मुंबईत ठिकठिकाणी दहीहंडी बांधण्यात आल्या आहेत. एकावर एक असे चित्तथराराक मानवी मनोरे रचून हंडी फोडण्यासाठी गोविंदा पथकं सज्ज झाले आहेत. काळाचौकी, वरळी, दादर, घाटकोपर, जोगेश्वरी, ठाणे अशा अनेक भागात दहीहंडीचा प्रचंड जल्लोष पाह्यला मिळाला. आयोजकांकडूनही हंडी फोडणाऱ्या गोविंदांसाठी सेफ्टी गियर, जमिनीवर गाद्या, हारनेस्ट आणि रुग्णवाहिकांची सोय करण्यात आली होती.

दहीहंडी आणि स्वातंत्र्य दिनाच्या पार्श्वभूमीवर मुंबई पोलीस दलातील ३५ हजार अधिकारी आणि जवान शहरातील अतिसंवेदनशील ठिकाणी तैनात करण्यात आले होते. केंद्रीय व राज्य राखीव बलाच्या १५ तुकड्या, एटीएस, शीघ्रकृती दल तैनात करण्यात आल्या होत्या. दहीहंडी आणि स्वातंत्र्य दिनाच्या सोहळ्यावर ड्रोनसह ५ हजार सीसीटीव्हींचा वॉच ठेवण्यात आलेला आहे.

११ लाखाची हंडी फोडली

ठाण्यात ९ थर लावणाऱ्या गोविदांसाठी ११ लाख तर घाटकोपरमध्ये २५ लाखांचं पारितोषिक जाहीर करण्यात आलं होतं. ठाण्यातील मनसेच्या दहीहंडीत जय जवान मंडळाचा नऊ थर रचण्याचा पहिला प्रयत्न फसला. तर नौपाड्यातील ११ लाखाची दहीहंडी फोडण्याची करामत बोरिवलीच्या शिवसाई मंडळाने करून दाखविली. शिवसाई मंडळाने नऊ थर लावून ही हंडी फोडून ११ लाखाचं बक्षीस पटकावलं.

ताडदेव येथे गोविंदा लटकला

ताडदेव येथे एक गोविंदा दोरीवर लटकल्याने अनेकांच्या काळजाचा थरकाप उडाला. पण गोविंदा पथकांनी या गोविंदाला उडी मारायला सांगून अलगद झेलल्याने त्याचा जीव वाचला. हा थरार पाहताना अनेकांचा थरकाप उडाला होता.