दत्ता दळवी यांचा पदाचा राजीनामा

उद्धव ठाकरे यांनीच राजीनामा देण्यास भाग पाडले?

म. टा. विशेष प्रतिनिधी, मुंबई

शिवसेनेच्या ईशान्य मुंबईतील महिला पदाधिकाऱ्यांमधील गटबाजी शिवसेना पक्षप्रमुख उद्धव ठाकरे यांच्यासमोरच उफाळून आल्यानंतर काही तासांतच याच विभागातील आणखी एक नवा वाद समोर आला आहे. माजी महापौर आणि ईशान्य मुंबई विभाग क्रमांक सातचे विभागप्रमुख दत्ता दळवी यांनी आपल्या पदाचा राजीनामा पक्षप्रमुखांकडे सोपविला आहे. मात्र दळवी यांनी राजीनामा दिला नसून, त्यांना राजीनामा द्यायला लावला, अशी जोरदार चर्चा आहे.

शिवसेनेच्या मुखपत्रातून पक्षाच्या ईशान्य मुंबईतील नव्या पदाधिकाऱ्यांच्या नेमणुका रविवारी जाहीर करण्यात आल्या आहेत. त्यात नेमणुकांसोबतच दत्ता दळवी यांनी स्वतःच्या पदाच्या दिलेल्या राजीनाम्याची माहितीही देण्यात आली आली आहे. वैयक्तिक कारणांमुळे दत्ता दळवी यांनी राजीनामा दिल्याचे यामध्ये म्हटले असले तरी दळवी यांनी स्वतःहून पदाचा राजीनामा दिला, की उद्धव ठाकरे यांनी त्यांना राजीनामा देण्यास भाग पाडले, याबाबत उलटसुलट चर्चा विभागात ऐकायला मिळत आहे. दळवी यांच्या राजीनाम्यामागे काही वेगळी वादग्रस्त कारणे असल्याचीही चर्चा आहे. या वादग्रस्त कारणांबाबतचे काही महत्त्वाचे पुरावेच पक्षप्रमुख उद्धव ठाकरे यांच्यापुढे सादर करण्यात आल्याने त्यांनीच दळवी यांना राजीनामा द्यायला सांगितले आणि त्यानुसार हा राजीनामा दिला, असेही सांगितले जात आहे.