दाऊद भारतात आ(ण)ला; राज ठाकरेंचं 'तर्क'चित्र

मटा ऑनलाइन वृत्त । मुंबई

'दाऊद इब्राहिमला स्वतःलाच भारतात यायचंय, तो त्याबाबत केंद्र सरकारशी 'सेटलमेंट' करतोय आणि भाजप त्याचं श्रेय घेऊन २०१९च्या निवडणुका लढवणार आहे', असा दावा करून खळबळ उडवून दिल्यानंतर मनसे अध्यक्ष राज ठाकरे यांनी याच विषयावर व्यंगचित्राच्या माध्यमातून मार्मिक भाष्य केलं आहे.

गुरुवारी आपलं फेसबुक पेज लॉन्च केल्यानंतर दुसऱ्याच दिवशी राज यांनी स्मारकांबाबतची भूमिका स्पष्ट करणारी पोस्ट शेअर केली होती. त्यानंतर काल रात्री उशिरा त्यांनी एक व्यंगचित्र पोस्ट केलं. त्याला त्यांनी 'तर्क'चित्र म्हटलंय. त्यात, दाऊद इब्राहिम केंद्र सरकारला - अर्थात पंतप्रधान नरेंद्र मोदींना पाकिस्तानातून भारतात खेचत आणताना दिसतोय. मात्र, आपणच त्याला पकडून आणलंय असं भासवत, 'आणलं की नाही फरफटत', असं वाक्य मोदींच्या तोंडी आहे. म्हणजेच, दाऊदला भारतात आणल्याचं श्रेय ते लाटताहेत. या व्यंगचित्रावर 'लाइक्स' आणि 'शेअर'चा पाऊस पडलाय.



आठवड्यातून दोन व्यंगचित्रं फेसबुक पेजवरून पोस्ट करण्याचा राज यांचा विचार आहे. या फटकाऱ्यांमधून ते कुणाला कसं फटकारतात याबद्दल सगळ्यांनाच उत्सुकता आहे. त्याची सुरुवात त्यांनी मोदींपासून केली आहे.