लोकल गर्दीमुळे महिलेचा मृत्यू

मुंबई:

पश्चिम रेल्वेचे गाडे विस्कळीत झाले असतानाच, गुरुवारी लोकलमध्ये उसळलेल्या गर्दीमुळे अलका पाठारे (४०) यांना जीव गमवावा लागला. बोरिवली स्थानकात प्लॅटफॉर्म क्र. तीनवर सकाळी ९.४५च्या तुडुंब भरलेल्या लोकलमध्ये शिरण्याच्या प्रयत्नात लोकल आणि प्लॅटफॉर्ममधील जागेत कोसळून त्यांचा मृत्यू ओढवला.

बोरिवली पूर्वेतील नॅन्सी कॉलनीमध्ये राहणाऱ्या पाठारे यांनी बीकेसी येथील कार्यालयात जाण्यासाठी बोरिवली स्थानक गाठले. दोन दिवस मुसळधार पावसामुळे त्यांना जाता आले नव्हते. चर्चगेट जलद लोकल येताच पाठारे यांनी आत शिरण्याचा प्रयत्न केला. पण गर्दीमुळे तोल जाऊन त्या लोकल व प्लॅटफॉर्ममधील जागेत पडल्या. जखमी अवस्थेत त्यांना कांदिवलीतील शताब्दी रुग्णालयात नेण्यात आले. पण तिथे दाखल करण्यापूर्वीच त्यांचे निधन झाल्याचे डॉक्टरांनी घोषित केले.