रिक्षा-टॅक्सी भाडेवाढीचा तिढा कायम

मुंबई : रिक्षा-टॅक्सीमीटरमध्ये अनुक्रमे २ व ३ रुपये भाडेवाढ देण्यावर शिक्कामोर्तब करण्यासाठी मुंबई महानगर प्रदेश परिवहन प्राधिकरणाची बैठक सोमवारी पार पडली. मात्र रात्री उशिरापर्यंत भाडेवाढीवर परिवहन प्राधिकरण अध्यक्ष आणि सचिवांची सही झाली नसल्याने प्रस्तावित भाडेवाढ खोळंबल्याचे सांगण्यात आले.

उद्योगमंत्री उदय सामंत यांच्यासोबत झालेल्या बैठकीनंतर घटस्थापनेच्या मुहूर्तावर घोषित केलेला रिक्षा-टॅक्सी संप मागे घेण्याची घोषणा शुक्रवारी केली. यावेळी भाडेवाढ देण्याचा अधिकार प्राधिकरणाला सोमवारी बैठक आयोजित करण्यात आल्याचे सांगण्यात आले होते. त्यानुसार दुपारी बैठक पार पडली. यात विविध वादग्रस्त मुद्दे असल्याने व परिवहन अधिकाऱ्यांमध्ये एकमत होत नसल्याने स्वाक्षरी होण्यास विलंब होत असल्याचे एका वरिष्ठ अधिकाऱ्यांचे म्हणणे आहे. वादग्रस्त विषय कोणते हे सांगण्यास मात्र अधिकाऱ्यांनी नकार दिला.

राज्याचे परिवहन आयुक्त डॉ. अविनाश ढाकणे यांना याबाबत विचारले असता, 'भाडेवाढीच्या निर्णयावर, तसेच बैठकीत झालेल्या विषयांच्या मुद्द्यावर आणि निर्णयावर सही बाकी आहे. ती झाल्याशिवाय माहिती देणे उचित नाही', असे त्यांनी सांगितले. यामुळे भाडेवाढ होणार की टळणार, असा पेच सोमवारी कायम राहिला.

सीएनजी दरात हवे

४० टक्के अनुदान

सीएनजीच्या दरात सातत्याने वाढ होत आहे. शहरात बेस्टची स्वस्त दरातील वाहतूक सुरू आहे. अॅपअधारित टॅक्सीसेवादेखील आहेत. अशी आव्हाने असताना सरकारने केवळ भाडेवाढ मंजूर करून आपले हात झटकू नयेत. रिक्षा-टॅक्सी व्यवसाय टिकून राहण्यासाठी ४० टक्के अनुदानित दरात सीएनजी उपलब्ध करून द्यावे, अशी मागणी रिक्षा-टॅक्सी चालकांकडून सातत्याने करण्यात येत आहे.