म. टा. प्रतिनिधी, मुंबई
चर्चगेट स्थानकाच्या इमारतीवरील महात्मा गांधी यांचे भव्य चित्र रंगवलेल्या अॅल्युमिनीयम फसाडचा धोकादायक भाग हटवण्यात आला आहे. प्रवासी सुरक्षेच्या दृष्टीने हा भाग हटवण्यात आल्याची माहिती पश्चिम रेल्वे प्रशासनाने दिली. बुधवारी दुपारी फसाडचा काही भाग कोसळून ज्येष्ठ नागरिकाचा मृत्यू झाला होता.
चर्चगेट स्थानकाच्या इमारतीसह स्थानकाचे चारही बाजूंनी स्ट्रक्चरल ऑडिट करण्याचा निर्णयही घेण्यात आला आहे. स्ट्रक्चरल ऑडिटमध्ये धोकादायक असलेला भाग पूर्णपणे काढून टाकण्यात येईल. सद्यस्थितीत प्रवासी सुरक्षिततेसाठी कोसळलेल्या भागाखालील आणि बाजूचे अॅल्युमिनीयम फसाड हटवण्यात आल्याची माहिती पश्चिम रेल्वेतील अधिकाऱ्यांनी दिली.
.................................
वायू वादळामुळे समुद्र किनारा आणि किनाऱ्या लगतच्या परिसरात सोसाट्याने वारा वाहत होता. फसाडच्या खालील भागातून वारा शिरल्याने बाहेर पडण्यास मार्ग न मिळाल्यामुळे कमकुवत झालेले फसाड निखळल्याचे स्पष्ट होत असल्याचे दिसून येत आहे. मात्र स्ट्रॅक्चरल आँडिटच्या अहवालानंतर या दुर्घटनेमागील मुख्य कारण समोर स्पष्ट होणार असल्याचे रेल्वे अधिकाऱ्यांनी स्पष्ट केले.
पश्चिम रेल्वेच्या उपनगरीय रेल्वेच्या रुळांलगत कोणतेही होर्डिंग्ज नसल्याची माहिती पश्चिम रेल्वेचे मुख्य जनसंपर्क अधिकारी रवींद्र भाकर यांनी दिली. स्थानकांवर तसेच स्थानक परिसरात असलेल्या होर्डिग्जची वर्षातून एकदा तपासणी होते. तपासणीत दोषी आढळल्यास त्याची तातडीने देखभाल-दुरुस्ती करण्यात येत असल्याची माहिती भाकर यांनी दिली. मध्य रेल्वेचे स्थानक, स्थानक परिसर आणि मध्य-हार्बर हद्दीत येणाऱ्या होर्डिंग्जची नियमितपणे देखभाल होत असल्याचा दावा मध्य रेल्वेच्या अधिकृत अधिकाऱ्यांनी केला आहे.
...........