टॅल्गो ट्रेन 'पास'; दिल्लीहून १२ तासांत गाठली मुंबई

मटा ऑनलाइन वृत्त । मुंबई

दिल्ली-मुंबईदरम्यान धावणारी वेगवान टॅल्गो ट्रेन अंतिम चाचणीत उत्तीर्ण झाली. या ट्रेननं १२ तासांपेक्षाही कमी वेळात दिल्ली-मुंबई हे अंतर पूर्ण केले. तिचा प्रवास दिल्लीहून शनिवारी दुपारी २ वाजून ४५ मिनिटांनी सुरू झाला. ताशी १५० किलोमीटर वेगाने ११ तास ४८ मिनिटांत हे अंतर पार करत आज पहाटे २ वाजून ३३ मिनिटांनी ती मुंबई सेंट्रल स्थानकात पोहोचली.

याआधी २ ऑगस्टला टॅल्गो ट्रेनची पहिली चाचणी झाली होती. दिल्ली ते मुंबईदरम्यान ही चाचणी पार पडली होती. मात्र, त्यावेळी पावसामुळे गाडीचा वेग कमी करण्यात आला होता.

सध्या राजधानी एक्स्प्रेसने नवी दिल्ली ते मुंबई प्रवासासाठी १६ तास लागतात. टॅल्गोमुळे हा प्रवास १२ तासांचा होणार आहे. टॅल्गो ट्रेन बनवणारी कंपनी स्पेनची असली तरी, या ट्रेनचं इंजिन भारतीय बनावटीचं आहे. या ट्रेनच्या एका डब्याची किंमत ५ कोटी रुपये असून, त्यात प्रीमिअम दर्जाच्या सुविधा देण्यात आल्या आहेत.