audit of bridge: मुंबईतील पुलांचे ऑडिट पुन्हा 'देसाई'कडेच

म. टा. विशेष प्रतिनिधी, मुंबई

छत्रपती शिवाजी टर्मिनस येथील हिमालय पादचारी पुलाचे सदोष ऑडिट करणाऱ्या डी. डी. देसाईज असोसिएटेड इंजिनीअरिंग कन्सल्टस अँन्ड अॅनॉलिसीस्ट प्रा. लि. कंपनीने दक्षिण मुंबईतील आणखी १६ पादचारी पुलांचे ऑडिट केले आहे. या पुलांच्या दुरुस्तीचा प्रस्ताव स्थायी समितीत मंजुरीसाठी मांडण्यात आला आहे. स्ट्रक्चरल ऑडिट केल्यानंतरही हिमालय पूल पडल्यामुळे देसाईने केलेल्या १६ पुलांच्या ऑडिटबाबत आता प्रश्नचिन्ह उभे राहिले आहे. या प्रस्तावावरून पालिकेची टीकेची झोड उठणार असल्याने प्रशासन हा प्रस्ताव मागे घेण्याची शक्यता आहे.

सीएसएमटी येथील हिमालय पुलाचे स्ट्रक्चरल ऑडिट देसाईच्या कंपनीने केले होते. कंपनीने पूल धोकादायक नसून दुरुस्ती करण्यास हरकत नसल्याचा अहवाल पालिकेला दिला होता. त्यामुळे निर्धास्त असलेल्या पालिकेला हा पूल कोसळल्यानंतर मुंबईकरांच्या प्रचंड जनक्षोभाला सामोरे जावे लागले असताना, आणखी १६ पुलांचे ऑडिट देसाई कंपनीने केल्याने पुन्हा वाद उभा राहणार आहे. हिमालय पुलाच्या सदोष ऑडिटबाबत निष्काळजीपबद्दल देसाई असोसिएटसचा मालक नीरव देसाई याला पोलिसांनी अटक केली असून पालिकेने या कंपनीला काळ्या यादीत टाकले आहे.

दक्षिण मुंबईच्या विविध भागातील १६ पुलांच्या दुरुस्तीचा हा प्रस्ताव असून दुरुस्तीसाठी पालिका १३ कोटी ४० लाख रुपये खर्च करणार आहे. जैन कन्स्ट्रक्शन या कंत्राटदाराला हे काम मिळाले असून पालिकेने अंदाजित केलेल्या खर्चापेक्षा तब्बल २१ टक्के कमी दरात काम करण्याची तयारी दर्शवून कंत्राटदाराने हे काम मिळवले आहे. बुधवारी होणाऱ्या स्थायी समितीच्या बैठकीत हा प्रस्ताव मांडण्यात आला असून देसाई असोसिएटसने या पुलांचे ऑडिट केल्याचा मुद्दा विरोधक उपस्थित करणार आहेत. त्यामुळे हा प्रस्ताव मागे घेऊन सर्व पुलांचे नव्याने ऑडिट करण्याची मागणी प्रशासनाकडे केली जाणार असल्याचे विरोधी पक्षनेते रवी राजा यांनी सांगितले.

या पुलांची दुरुस्ती

ग्रँट रोड रेल्वे स्थानकारवरील पूल

ऑपेरा हाऊस पूल

फ्रेंच पूल

हाजीअली भुयारी मार्ग

फॉकलंड रोड

प्रिन्सेस स्ट्रीट पूल

चर्चगेट उत्तर भुयारी मार्ग

ग्लोरिया चर्च उड्डाणपूल

वाय ब्रिज उड्डाणपूल

इस्टर्न फ्री वे

एसव्हीपी रेल्वे पूल

वाय. एम. उड्डाणपूल

पी. डिमेलो पादचारी पूल

डॉकयार्ड रोड पादचारी पूल

चर्चगेट दक्षिण भुयारी मार्ग