म. टा. खास प्रतिनिधी, मुंबई
सोसायटीच्या नावे जमीन हस्तांतरण करण्यासाठी सव्वा लाखांची लाच मागणाऱ्या महिला सहायक नगर रचनाकारास लाचलुचपत प्रतिबंधक विभागाच्या पथकाने गुरुवारी अटक केली. मनीषा राजीव सिंग (४७) असे या महिला महिला सहायक नगर रचनाकाराचे नाव असून त्यांच्यासह एका खासगी एजंटलाही अटक करण्यात आली आहे.
एका खरेदी-विक्री सल्लागाराने एका गृहनिर्माण सोसायटीच्या नावे जमीन हस्तांतरण करण्यासाठी मुद्रांक जिल्हा अधिकारी कार्यालय, अंधेरी तालुका या वांद्रे पूर्व बीकेसी येथे कागदपत्र सादर केले. यावर अंतरिम आदेश काढण्यासाठी मनीषा सिंग यांनी एजंट महेश कट्टीमनीच्या मार्फत सव्वा लाख रुपयांची मागणी केली. याबाबत या सल्लागाराने तक्रार केल्यानंतर एसीबीच्या अधिकाऱ्यांनी सापळा रचला. महेश यांच्यामार्फत लाचेचा ५० हजारांचा पहिला हफ्ता घेताना मनीषा यांना पकडण्यात आले.