म. टा. विशेष प्रतिनिधी, मुंबई
हृदयाला रक्तपुरवठा करणाऱ्या वाहिन्यांमध्ये असलेल्या अतिरिक्त कॅल्शिअममुळे हृदयविकारशस्त्रक्रियांमध्ये स्टेन्ट टाकूनही रुग्णाला लाभ होत नाही. त्यामुळे हृदयरक्तवाहिन्यांमध्ये साठलेले कॅल्शिअम काढून टाकण्यासाठी आता 'शॉक व्हेव थेरपी' विकसित करण्यात आली आहे. जगभरामध्ये आता वापरात आलेली ही थेरपी शुश्रुषा रुग्णालयामध्ये ८१ वर्षीय महिला रुग्णासाठी पहिल्यांदा वापरण्यात आली आहे.
शुश्रुषा रुग्णालयात कार्डिओलॉजिस्ट डॉ. राजीव भागवत यांनी ही थेरपी वापरून शस्त्रक्रिया यशस्वीरित्या पार पाडली. एक वर्षापूर्वी वरील आजींची अँजिओप्लास्टी झाली होती. त्यावेळी तीन स्टेन्ट टाकण्यात आले होते. या स्टेन्टच्या खाली नवीन ब्लॉक तयार झालेला दिसून आला. त्यामुळे त्यांना वेदनाही होत होत्या. या ठिकाणी फुगा वापरून अँजिओप्लास्टी करण्यात आली. यावेळी वरच्या स्टेन्टची पाहणी केली तेव्हा ते अतिरिक्त कॅल्शिअममुळे पुरेसे उघडलेले नल्याचे लक्षात आल्याने ही थेरपी वापरल्याचे डॉ. भागवत यांनी सांगितले.
स्टेन्टचे कार्य प्रभावी करण्यासाठी
डॉ. भागवत यांनी या थेरपीबद्दल माहिती देताना सांगितले की, या वृद्धेला छातीमध्ये वेदना होत होत्या. स्टेन्टचे कार्य प्रभावीरित्या होत नसल्यामुळे छातीत सतत दुखत होते. या वैद्यकीय उपचारपद्धतीसाठी अंदाजे अडीच लाख रुपयांपर्यंतचा खर्च येतो. त्याचा वापर जसजसा वाढेल तशी ही उपचारपद्धती परवडेल, याकडेही त्यांनी लक्ष वेधले. अतिरिक्त कॅल्शिअम काढून टाकण्यासाठी यापूर्वी प्रचलित असलेली पद्धतीमध्ये रुग्णाला जखम होते, ही नवी थेरपी कमी वेदनादायी आहे. त्यामुळे जखम होण्याची शक्यताही कमी होते.