राजीनामा देणार का?; धनंजय मुंडेंनी दिलं 'हे' उत्तर

मुंबईः बलात्काराच्या आरोपांनतर धनंजय मुंडे पहिल्यांदाच राष्ट्रवादी काँग्रेसच्या पक्ष कार्यालयात पोहोचले आहेत. यावेळी त्यांनी या आरोपांवर सविस्तर भाष्य केलं आहे.

धनंजय मुंडे यांच्यावरील आरोप गंभीर असल्याचं सूचक वक्तव्य शरद पवार यांनी केलं होतं. तसंच, पक्षातील इतर सहकाऱ्यांसोबत चर्चा करुन तातडीने योग्य तो निर्णय घेतला जाईल. असं म्हटलं होतं. त्यामुळं धनंजय मुंडे राजीनामा देणार असल्याची शक्यता निर्माण होत आहे. याबाबत धनंजय मुंडे यांनी प्रसारमाध्यमासोबत संवाद साधत भाष्य केलं आहे.

मी स्वतः शरद पावरांकडे स्पष्टीकरण दिलं आहे. बुधवारी सकाळीच मी त्यांची वेळ घेतली आणि भेटून सविस्तर माहिती दिलेली आहे. आणि माझं व्यक्तीगत जे म्हणणं आहे ते मी प्रेसनोटच्या माध्यमातून प्रसारमाध्यमांना दिलं आहे, असं मुंडे यांनी म्हटलं आहे. शिवाय, राजीनाम्याबाबत शरद पवार आणि पक्षातील मोठे नेते विचार करतील आणि त्याबाबत निर्णय होईल, असं त्यांनी स्पष्ट केलं आहे.

शरद पवार काय म्हणाले?

धनंजय मुंडे यांच्यावरील आरोपांचं स्वरुप गंभीर आहे. यावर पक्ष म्हणून विचार करावा लागेल. धनंजय मुंडे यांनी मला सांगितलेली माहिती पक्षातील इतर सहकाऱ्यांना देणं हे माझं कर्तव्य आहे. याबाबत पक्षातील इतर सहकाऱ्यांशी चर्चा करु आणि पक्ष म्हणून निर्णय घेऊ. याला जास्त वेळ लागेल, असं वाटत नाही. कोर्टातील गोष्टींमध्ये मी पडत नाही, पण पक्षप्रमुख म्हणून जे काही निर्णय घ्यावे लागलीत ते तातडीने घेऊ, असं शरद पवार यांनी म्हटलं आहे.