मृत्यू जवळून पाहिला…

डॉ. रोहन यांनी ​जागवल्या हल्ल्याच्या आठवणी

म. टा. विशेष प्रतिनिधी, मुंबई

‘रुग्णाच्या नातेवाईकांनी ड्रेंसिंगची कात्री, लोखंडी रॉड, खुर्च्या अशा हाताला सापडतील त्या वस्तूंनी बेदम मारहाण करण्यास सुरुवात केली. चारही बाजूने जमाव माझ्यावर तुटून पडला होता…वाटले आता सारे संपले. मारहाणीमुळे शुद्धच हरपली. डोळे उघडले तेव्हा आयसीयूमध्ये होतो,’ डॉ. रोहन सांगत होते.

कांदिवली चारकोपमधील डॉ. रोहन यांनी ऑर्थोपेडिक विषयात पोस्ट ग्रॅज्युएशन करण्यासाठी धुळ्यातील शासकीय वैद्यकीय महाविद्यालयात प्रवेश घेतला. सहा फूट उंच तगडी देहयष्टी असल्यानेच ते एवढा मार पचवू शकले, असे डॉ रोहनचे प्राध्यापक डॉ. योगेश झाडबुके सांगत होते. त्यांनी खरोखच जवळून मरण पाहिले. आम्हीही त्यांच्याशी बोलण्याचा प्रयत्न करीत आहोत पण ते बोलण्याच्या मनस्थितीत नाहीत, असे डॉ. झाडबुके म्हणाले. जे. जे. रुग्णालयातील नेत्रतज्ज्ञ डॉ. तात्याराव लहाने यांनीही डॉ. रोहन यांना तपासण्याची तयारी दर्शवल्याचे ते म्हणाले.

या घटनेला दोन दिवस उलटून गेल्यावरही डॉ. रोहन प्रचंड मानसिक तणावाखाली आहेत. ‘हल्लेखोरांनी केलेल्या मारहाणीत डोळा निकामी होण्याची वेळ आली आहे. हल्लेखोरांनी डाव्या डोळ्यावर जबर मारहाण केली, मोबाइलही चोरून नेला,’ असे ते सांगत होते. मंगळवारी संध्याकाळी त्यांना पुढील उपचारांसाठी ठाण्यातील ज्युपिटर रुग्णालयात दाखल करीत आहोत, असे डॉ. रोहन यांचे भाऊ विपुल महामुणकर म्हणाले.

सर्व संघटना एकत्र

या हल्ल्यानंतर इंडियन मेडिकल असोसिशन(आयएमए), नॅशनल इंटिग्रेटेड मेडिकल असोसिएशन, होमिओपॅथीक मेडिकल असोसिएशन, महाराष्ट्र नर्सिंग फेडरेशन, चतुर्थ श्रेणी कामगार संघटना अशा सर्व संघटना एकत्र आल्या आहेत. या घटनेच्या निषेधार्थ इंडियन मेडिकल असोसिएशनच्या देशातील सुमारे बाराशे शाखांमध्ये व राज्यातल्या वैद्यकीय महाविद्यालयात धरणे आंदोलन पुकारण्यात येईल, असे आयएमएचे राष्ट्रीय अध्यक्ष डॉ. रवी वानखेडे यांनी सांगितले.

मार्डचा संप

या हल्ल्याचा निषेध करण्यासाठी राज्यातल्या निवासी डॉक्टरांनी हाताला काळ्या फिती लावून काम केले. लवकरच याविरोधात संप पुकारण्यात येईल असा इशारा ‘मार्ड’ने दिला आहे.

मार्डवर टीका

वैद्यकीय क्षेत्रात कार्यरत असलेल्या कर्ण प्रतिष्ठानचे अध्यक्ष डॉ. राहुल घुले यांनी या घटनेनंतर निवासी डॉक्टरांच्या मार्ड या संघटनेवर टीका केली आहे. डॉक्टरांवर वारंवार हल्ले होऊनही मार्ड निष्क्रीय आहे. वैद्यकीय शिक्षण मंत्र्यांबरोबर चर्चा, चहापान, जेवण व मंत्र्यांसोबत सेल्फी एवढ्या पुरता मार्ड मर्यादित राहिली आहे. डॉक्टरांवर हल्ले करणाऱ्या एकाही आरोपीला शिक्षा झालेली नाही, याकडे डॉ. घुले यांनी लक्ष वेधले.

जनआरोग्य संघटनेतर्फे निषेध

या मारहाणीचा जन आरोग्य ‌अभियानने तीव्र शब्दात निषेध केला आहे. अपुरा निधी, अपुरे मनुष्यबळ, औषधांची कमतरता अशा अनेक समस्या सार्वजनिक आरोग्य व्यवस्थेत पाहायला मिळतात. या समस्या सोडवण्यासाठी प्रशासनाने लक्ष देण्याची गरज जन आरोग्य ‌अभियानचे डॉ. अनंत फडके, डॉ. अभिजित मोरे आदींनी व्यक्त केली.