म. टा. विशेष प्रतिनिधी, मुंबई
नवी मुंबई आंतरराष्ट्रीय विमानतळाचे काम सुरू असून या भागातील मच्छिमारांच्या उपजीविकेसाठी त्यांचे पुर्नवसन होणे अपेक्षित आहे. त्यासाठी त्यांचा सर्वे करण्यात यावा, असे निर्देश नगरविकासमंत्री एकनाथ शिंदे यांनी गुरुवारी मत्स्यव्यवसाय विभागाच्या सचिवांना दिले. सिडकोने मच्छिमार बांधवांचे योग्य पुनर्वसन करावे, असेही त्यांनी यावेळी सांगितले.
नवी मुंबईतील प्रकल्प बाधितांच्या विविध प्रश्नांबाबत मंत्रालयात नगरविकासमंत्र्यांच्या अध्यक्षतेखाली बैठक झाली. त्यावेळी त्यांनी हे निर्देश दिले. सिडकोमध्ये प्रकल्पग्रस्तांना रोजगार देण्यात आला आहे. विविध आस्थापनांमध्ये कंत्राटी पद्धतीने ते काम करत असून त्यांचे वेतन, भविष्य निर्वाह निधी आदी मागण्यांबाबत बैठकीत चर्चा करण्यात आली. सिडको प्रकल्पग्रस्त म्हणून काम करणाऱ्या भूमिपूत्रांना काम करणाऱ्या कंत्राटदाराने सरकारच्या नियमाप्रमाणे किमान वेतन, सुट्ट्या, भत्ते, बोनस दिला पाहिजे. यासाठी सर्व कंत्राटदारांची बैठक बोलावून त्यामध्ये त्यांना निर्देश द्यावेत असे नगरविकासमंत्र्यांनी यावेळी सांगितले. त्याचबरोबर परिवहन कंपनी बंद पडल्यामुळे जे बेरोजगार झाले आहेत, त्यांच्या उदरनिर्वाहासाठी उलवे, करंजाडे, द्रोणागिरी येथे भूखंड, काही ठिकाणी गाळे उपलब्ध करून द्यावेत, अशा सूचनाही त्यांनी दिल्या.